Uyah Asem Kelenthang

Moh. Syaiful (dipublikasikan pada Jumat, 18 Oktober 2019 08:32 WIB)
- Kuliner

 (Olahane Mbok Komah)

            Kelenthang iku uwohe kelor. Kadhung rika kabeh wis weruh kadhung jangan kelor iku olahane wong Banyuwangi hang seger lan enjong, saiki ring kene Mbok Komah arep olah jangan kelenthang  uwohe kelor hang uga sing kalah seger lan sing kalah enjonge ambi godhonge kelor.

            Kelenthang hang keneng diolah jangan asem iki kudu dipilih hang sing kari tuwek makne sing atos kadhung diolah jangan. Ring kene kecute jangan kelenthang nganggo belimbing wuluh. Masiya arane uyah asem naming sing nganggo asem. Jare Mbok Komah kadhung nganggo asem jangan kelenthang sing katon keninge. Kecute belimbing wuluh ambi asine uyah bisa ndadekaken kelenthang kerasa seger lan enjong.

            Ayo dicacak nggawe jangan uyah asem kelenthang  nganggo resepe Mbok Komah.

            Kanggo kelenthang setengah kilo butuh belimbing wuluh hang akehe 2 ons. Kawitane kelenthang disisiki kulite nganggo lading nggo ngilangaken kulit njabane. Naming sing sampek jeru mung sewates kulit njabane bain.

            Mari disisiki kelenthang aju ditugeli hang dawane kira-kira 7 cm bain aju gediku dikumbah nong banyu hang mili utawa digerujuk nong banyu kran,  makne rijik lan pulute ilang. Sakteruse nyepakaken belimbing wuluh hang wutuh sing kathik ditugeli.

            Ragine jangan uyah asem kelenthang iki jare Mbok Komah mung ragi sambel bain yaiku; lobok abang (gedhe) 2 bain, bawang abang 3 siung, uyah, terasi sithik, gula pasir sak pucuke sendhok mangan, aja lali laos digepleng gedhene sakjempolan tangan ambi irisan godhong bawang hang akehe telung lembar.

            Kabeh ragi aju digerus alus aju, sakteruse banyu telung  lumur gedhe digodhok nong panci sampek gemulak, serta banyu nong panci wis gemulak kelenthang, belimbing wuluh lan ragi hang wis alus dilebokaken nyang pancine. Entenana sampek kelenthange empuk godhong bawang irisane diuwur-uwuraken. Kadhung kelenthang wise meh melethek-melethek jangan dientas merga wis mateng.

            Wis ayo saiki padha olah jangan kelenthang, seru segere kadhung dipangan wayah usum panas gediki. Olahe gampang naming seger lan enjong jangane. Paran maning kadhung disandhingaken ambi gorengan tempe lan sambel ranti mentakan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.