Warung Bu Sum, Panganan Umah lan Sate Garingan

Antariksawan Jusuf (dipublikasikan pada Sabtu, 24 Juli 2021 07:12 WIB)
- Kuliner



Lahan tepat untuk iklan anda di sini.

Hubungi: skb@belambangan.com atau WA telp 0811843457


Ana teorine wong dodolan panganan, kadhung kepingin warunge garus, ajeg ditekani wong tuku, dodola bain panganan umahan, panganan hang saben dina digoleti uwong. Kadhung saiki tepak ana wong garus merga dodolan panganan aneh-aneh, panganan anyar hang hing saben dina ditemoni, iku mesthi mung payu musiman.
   Ring Banyuwangi ana pirangane warung hang dodol panganan sedina-dina kaya Warung Bu Sum ring Jalan Jaksa Agung Suprapto 143.
   Panggonane rijig, masiya cilik taping sembarang janganan hang digoleti uwong, utamane wong hang mulih kampung nggoleti jangan hang bengene kerep diolahaken emake ring umah, ana ring kene.
   Warunge rame merga hing mung dadi jujugan wong Banyuwangi hang wis golet penguripan nong njaba lan tepak mulih hing kober olah-olah janganan hang nggawe kangene ati, taping uga ditekani wong sak ubengane merga rasane enak lan nyuguhaken janganan sedina-dina. Kaya anjrahe warung ring Banyuwangi, cara nyuguhine, wong kari njaluk jangane lan milih methik iwake. Jangane ana kayata jangan kelor, jangan kelenthang, oseng-oseng terong, janganan Bali pakis ontong, oseng-oseng buncis lan sop. Dene iwake kari milih dhewek ana enus cemeng, maneka pelasan, utek sapi, ati rempela, opor pitik, gurami goreng, teri kacang, sate endhog gemek, bothok tahuk, mangut lele, pitik suwir lan ana peyek urang. Kerupuke wis cemepak ring meja.
   Pokoke kerasa madhang olahane emak nong umah taping prei korah-korah piringe.
   Kaya aran warunge, Bu Sum setemene hang ngawiti mbukak warung iki kira-kira taun 1980an. Saiki Bu Sum wis rada ngunduri, mung ngerewangi sithik-sithik nong pawon. Dene hang ngelayani saiki diganteni anak wadone.
   Ana maning panganan hang setemene dudu panganan has Banyuwangi taping bisa dadi suguhan has hang ana ring warung kono yaiku sate Solo. Hing kaya anjrahe sate ring Banyuwangi, sate pitik iki garingan hing kathik dirageni kecap utawa ragi kacang merga dirageni lan wis mateng sedurunge dipanggang. Dadi satene keset lan bisa digadho hing mung dadi kanca madhang. Satene wis dibungkus pirangane sundukan sak pelastik.
   Dadi kadhung kepingin olahane emak ring Banyuwangi, kampaha ring warung Bu Sum.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor