Warung Emak Lemahbang Sedhiya Wader lan Bothok Tawon

Antariksawan Jusuf (dipublikasikan pada Sabtu, 17 Juli 2021 07:40 WIB)
- Kuliner



Lahan tepat untuk iklan anda di sini.

Hubungi: skb@belambangan.com atau WA telp 0811843457


Panganan tradhisional hang nyuguhaken iwak wader, welut goreng utawa bothok tawon keitung magih akeh ring Banyuwangi. Utamane kadhung teka Rogojampi ngidulaken hang liwat Mangir utawa hang ngulonaken liwat Lemahbang. Ring Mangir ana pirangane warung hang nyuguhaken menu tradhisional iku. Ana pisan hang ring Lemahbang kulon, Warung Emak arane. Ana ring tengen dalan kadhung teka pertelon Lincing ngulonaken. Nong ngarepe ana cendhela bukaan dawa werna kuning, sak liyane dienggo melebu metune hawa bisa nduduhaken pisan panganan paran hang diedol makene katon teka njaba.
   Arane hang dodol Bu Misnah hang wis 30 taun dodolan nerusaken usaha bapake dodol sega kelawan menu tradhisional mau sakat iyane cilik.
   Wader goreng, ana pelasan putihan lan pelasan lele disuguhaken ambi pecel utawa jangan tombol. Kadhung magih jangkep ana pisan pecel kare, macem-macem pelasan (welut, mujaer, lele, dheleg lan iwak segara biyasahe iwak putihan) lan bothok tawon dideleh nong ngarepe wong hang marung dadi bisa njuwut dhewek. Dene wadere dideleh ring njero.
   Warunge iki katon rijig masiya parek seru ambi lurung. Isuk meruput jam 6 wis mbukak lan tutup jam 5 soren. "Taping kadhung dodolane telas, ya tutup," jare Bu Misnah. Sedina kira-kira ngentekaken wader telung kilo. "Hing entek endane wadere dijuwuti saben dina semono akehe," batinisun. Taping ya buktine saben dina ana hang diedol. Iki buru warung siji, ale ana pirangane warung wader hang ana ring Rogojampi. Setengahe iki nduduhaken gok ekosistem banyu hang ana ring wilayah kono magih apik lan sehat. Kadhung using, iwak wader hing bisa nganak semono akehe. Muga-muga bain nggolete hing disetrum, merga kadhung disetrum iwake gemet sak anak cindhile pisan.
    Isun teka sedurunge jame wong mangan wayah bedhug, kira-kira jam 11. Arane bothok tawon buru ngentas, pincukane magih ngetokaken weleke. Aromane wis nggarai weteng tambah keroncongan. Hing kerasa jak loron entek sega wader jangan tombol lan sega pecel wader rong piring, ambi bothok tawon loro. Ditambah ngombe banyu putih loro enteke hing sampek 40ewu.
  Marek mangan jam setengah rolasan, wong mangkat teka. Warunge mara-mara ebeg wong. Isun metu, gantenan lungguhane.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor