Wisata Rawa Ring Tengah Kutha
Hasan Sentot (dipublikasikan pada Minggu, 12 Januari 2020 09:25 WIB)
- Wisata
Kadhung rika kuweleh nyang pesisir tengah kutha Banyuwangi, acak menyango nyang Pesisir Cacalan ring Kelurahan Klatak, Sukowidi, Banyuwangi. Pesisir Cacalan iki sing terima nawakaken kahanan pesisir Banyuwangi hang banyune kening, iyup akeh uwit kelapane. Naming lebih teka iku. Ana rawa alas Bakau werane sak hektar.
“Bengen, rawa ring pinggir pesisir Cacalan iki kotor seru. Akeh romot nyangsang, uga banyune getuh merga sing dirumat. Suwene setahun, didandani lan dirijiki. Malah tanduran Bakau iki seja ditandur, kanggo nyaring banyu rawane mane kening lan uga bisa kanggo ngedhang banyu segara mane sing abrasi”, ujare Arif, salah sijine Pengelola Pesisir Cacalan.
Pesisir Cacalan dirumat swadaya masyarakat sak kiwa tengene, sakat teka rijig-rijig, njaga lan ndandani uba rampene panggonan wisata kaya umume. Melebu nang Pesisir Cacalan mung ditarik karcis Rp. 5000, bisa meneng ndeleng Pulau Bali, ngerasakaken silire angin segara lan birune banyu segara selat Bali.
Kanggo hang wis kuweleh ndeleng ombak segara lan adheme angin, bisa milih Rawa Bakau hang sing adoh teka pesisir. Banyune kening, akeh iwak-iwak hang nyeja diingu ambi pengelolane. “Iki minangka Wisata Pendidikan, kanggone lare-lare seru tepake. Iwak-iwak iki diingu lan digenengaken, mane mangan bercung utawa lemut hang urip ring rawa. Dadi sing kuwatir kadhung ana malaria ring kene, merga wis diatasi ambi iwak-iwak hang akeh keloyongan ring rawa iki. Romot hang sak durunge akeh kemambang lan numpuk, saiki ajeg dirijigi”, tambah Arif.
Kanggone hang teka nyang Pesisir Cacalan, iki dadi pilihan liyan hang keneng dienggo nyenengaken keluwarga lan anak-anake. Paran maning banyu rawane cethek, mung 50 centimeter utawa setengah meter. Cukup mbayar Rp. 10.000, wis bisa nyewa perahu kano keliling rawa suwene 20 menit. Kadhung kurang dawa, bisa nambah maning. “Enak ring kene, banyune kening. Hawane ya adhem, ngisore kelapaan lan tanduran bakau. Anakisun seneng, angger preian ngajaki merene”, ujare Prisca salah sijine pengunjung.
Omongan hang meh padha uga disampekaken Sumiyati, meh angger preian sekolah anak-anake diajak nyang Cacalan. Malah wayah ana dulure teka Jember teka merene, uga diajak nyang Cacalan. “Anak lan dulur-dulurisun wis kerep nyang Boom, makane diajak merene seru senenge. Paran maning serta weruh ana rawa lan bisa nunggang perahu kano. Lebih teka iku, ring kene akeh wong dodolan panganan lan regane murah-murah”, jare Sumiyati seneng.
Serta ana tambahan Rawa ring Pesisir Cacalan, saiki cacahe wong-wong hang teka merana saya tambah. Masiya dadi jujugan panggonan wisata hang sedherhana, naming bisa kanggo keluwarga bareng. “Kene lengkap, anak –anake bisa memengan pasir lan nunggang perahu Kano. Bapak lan emake bisa marung, akeh panganan hang has Banyuwangi lan regane murah. Saiki sing terima preian bain ramene, sore ngarepaken Magrib ya akeh hang padha teka nyang Pesisir Cacalan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.