Wong Kalibaru, Ulih Hadhiyah Kalpataru
Antariksawan Jusuf (dipublikasikan pada Selasa, 27 Februari 2024 08:01 WIB)
- Tokoh
Sapa hang nyangka, gok alas bakau (mangrove) hang ana ring sak dawane pesisir Teluk Balikpapan iku hang ngeramut wong Kalibaru, Banyuwangi. Merga ngerawati alas 150 hektar iku kira-kira ana 15 juta uwit lan nandur lebih teka sakjuta uwit mangrove, iyane diganjar hadhiyah Kalpataru Bidang Perintis Lingkungan taun 2017 kepungkur.
Agus Bei, lare desa Terongan kidule setasiyun Kalibaru lulusan STM PGRI Banyuwangi, malah tau diundang ring program tipi Kick Andy ulan September taun 2023 sore.
Kang Agus dhewekan ngawiti nanduri alas mangrove sampek iyane ninggal pegaweyane ring perusahaan ring Balikpapan.
Alas hang saiki arane Graha Indah Kariangau Balikpapan iku setemene mungsret teka 200 hektar tepak iyane ngawiti "mbabat alas" kelawan nandur mangrove. Hang 50 hektar merga tanahe duwene wong pribadi, saiki wis uwah dadi umah lan liyane.
Sak suwene wolung taun kawitane, Kang Agus iki jempalikan dhewek nandur lan njaga alase. Wong-wong buru ngarti gunane mburi-buriyan. "Kadhung ngajak uwong, mesthi ana itungane, Isun ulih paran, yara digu?" jare Kang Agus hang saiki dibantu limang relawan.
Pekara alas iki kelebu perkara hang dadi kawigatine wong sak donya. Merga itungane alas 150 hektar iki saben taun bisa nyesep 6000 ton emisi karbon. "Isu penting saiki iku uwahe iklim."
Ana 10 utusan teka negara njaban kayata teka kedutaan Argentina, Inggris, Kazakhtan, Norwegia, Polandia wis nekani alas mangrove hang dirawati Kang Agus.
"Wong-wong teka kedutaan iku padha kaju ndeleng alas mangrove dikelola kelawan cara swadaya," jare Kang Agus.
Kadhung diitung-itung, setemene ana potensi sampek 2000 hektar. Naming ana ganjelan, tanahe iku duwene uwong. "Kadhung mbangun yara kudu jelas duwene sapa." Sebagiyan potensi alas 2000 hektar mau ana hang rusak, dadi dermaga, dadi mall. "Isun ngelola 150 hektar merga parek teka umah. Iki bain kang Hun jaga."
Kawasane kelebu area Teluk Baikpapan. Malah kelebu kutha Balikpapan. Kok ana alas ring njero kutha? "Ya meriniya, buktekaken dhewek," jare Kang Agus.
Pindhah nang Balikpapan taun 1989, Kang Agus ngawiti teka mbambung. Ahire dadi karyawan sampek dadi pengusaha. Pengusaha ya kudu peduli lingkungan, malah usahane dadi supplier ditinggal.
Iyane nduwe kerenteg nang mangrove merga rusake pesisir ring kono aju mudhun nangani dhewek. "Kadhung mung tertarik, hing ana aksi lan peduli, ya padha bain. Kudu kene dhewek hang peduli."
Saiki kawasan mangrove Graha Indah Kariangau dadi panggonan jujugan wong kelenceran. Uga panggonan jujugan lalare sekolah sinau bab lingkungan. Hing mung semono, merga dadi jujugan kelenceran, jumbul trayek montor nong kawasan kono. Uga bisa nguripi UMKM hang mbukak dhasaran kanggo wong hang teka.
Ambi setengah guyonan Andy F. Noya, ngomong, hing maido kadhung Kang Agus ulih sebutan teka uwong-uwong yaiku "Presiden Mangrove Indonesia".
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
