Yon DD, Gendhinge Kudu Using Temenanan
Antariksawan Jusuf (dipublikasikan pada Sabtu, 07 September 2024 08:58 WIB)
- Tokoh
Yon’s DD: Gendhinge Kudu Using Temenanan
(Gesahan ambi Penganggit Gendhing Using)
Sapa hang sing kenal ambi gendhing “Semebyar?” Gendhing iki wis anjrah ana ring bumi Nusantara iki. Kadhung wong-wong wis kenal “Ulan Andhung-andhung.” sakliyane mesthi gendhinge “Gelang Alit,” sakteruse mesthi bain ya “Semebyar.”
Gendhing iki melebu ana ring albume “Layangan” hang digawa ring POB (Patrol Orkestra Banyuwangi). Acake weruhtah sapa hang nganggit gendhing apik iki?
Eh temokena hang nganggit Kang Yon’s DD. Kang Yon’s DD iki kelebu pentholane POB sakliyane Catur Arum. Kang Yon’s hang wis melebu metu ring seni musik Banyuwangi, wis sakat bengen menganan band-band-an ring taun 90-an iki seru getune nyang pulet-tukare gendhing-gendhing Using. Sing salah iyane kedhapuk dadi pengurus ring Persatuan Pencipta Lagu dan Gendhing Using Banyuwangi.
Sakat band-band-an sepi tanggapan merga ana musik elektone iyane mangkat memengan musik-musik akustikan biyasah ambi nggawe-nggawe gendhing. Tahun 2000 iyane mangkat kumpul ambi Catur lan kanca-kanca liyane hang padha-padha dhemen nggawe gendhing, aju nggawe grup POB. Sakteruse taun 2002 bisa rekaman kaset album “Layangan.” Alhamdulillah bisa ngehit.
Gendhing-gendhinge wong lanang kelairan Banyuwangi 24 April 1963 iki nyata enak temenan lan bisa dadi legendha sing kalah ambi “Ulan Andhung-andhung", “Tanah Kelahiran", lan “Gelang Alit” hang wis anjrah sakdurunge.
Sakliyane Semebyar gendhing hang enak uga ana antarane: “Mawar”, “Ping Pindho”, lan “Gandrung Using” hang liyane digawe ambi Catur: “Tetese Eluh”, “Layangan” “Telung Segara”, “Semendhe ning Dhadhane” lan “Angin.”
Seperene Kang Yon’s DD hang duwe aran asli Triyono Adie iki magih pulet ring kesenian hususe seni musik. Ring taun 2015 iyane ambi kanca-kanca seniman Banyuwangi mandhegani “Lalare Orkestra”. Yaiku panggonane kumpul lare-lare cilik hang sinau tabuhan lan gendhing Banyuwangi kanggo nguri-uri keseniane dhewek.
Ring kampus Akademi Lalare Ochestra Kang Yon’s DD ditemoni Lontar Using sakperlu gesah angenan lan kepinginanane Kang Yon’s DD ring kesenian kanggo dina mburian.
Assalamualaikum Kang Yon’s. Milu bungah atinisun merga Rika bisa ajeg lan jejeg nguri-uri gendhing-gendhing Banyuwangi sampek seperene. Paran dhasare Rika gelem terus nguri-uri gendhing Using iki?
Walaikum salam…Gedigi ya… Wong Banyuwangi iki wis diuweni idhentitas dhewek ana ring seni musik. Merga wong Banyuwangi duwe notasi dhewek yaiku notasi Banyuwangi. Mula iku kabeh kudu dijaga makene lestari. Acake tah delengan kabupaten-kabupaten liya ring Jawa Timur iki madak ana hang duwe idhentitas kaya Banyuwangi. Banyuwangi iki nduwe gendhing Using hang beda ambi dhaerah liyane.
Pengalaman Rika urip wis merana-merene, ibarate telung segara wis Rika lakoni gedhene ombak wis Rika sabrangi, munggah mudhune pasar seni musik Banyuwangi ya wis tau kabeh Rika lakoni. Acake ceritakena kepinginanrika paran ring dina mburi kanggone seni musik utawa gendhingan Banyuwangi iki?
Gendhing Banyuwangi hang saiki iki wis akeh hang sukur-sukur muni. Nggawe basanan ya sukur-sukur sing dideleng artine lan wolak-walik pikirane, merga basanan iki sing mung dhong-dhinge suwara lagu naming kudu bener arti lan maknane. Mula iku Isun kepingin ngajak nyang penyair lan pencipta lagu lan gendhing Using sinau maning nyang basa Usinge. Kadhung sing bisa aja maksa naming kudu wani takon. Insyaalloh kadhung takon nyang Isun mesthi Isun dhemen njawab kadhung Isun bisa mangsuli.
Nggumun Isun weruh angenanrika lan pikiranrika nyang bab basa Using iki. Jempol temenan Rika. Kadhung weruh lare cilik-cilik ajar gendhing Banyuwangi gedigi Isun seru dhemene Kang. Kelendi anggonrika ngajari lare-lare ring Akademi Lalare Orkestra iki?
Hang penting nomer siji lare-lare cilik iki kudu dhemen sulung nyang gendhing Using. Kadhung wis dhemen aju bisa nirokaken hang wis ana. Diajari sithik teori olah vokal lan olah rasa gedigu bain aju dicacak ambi tabuhan. Sing repot wis hang penting lare-larene kudu duwe karep hang gedhe. Paran maning iki ana ring Akademi Lalare Orkestra Banyuwangi hang wis duwe aran gedhe. Kudune kekarepane wis gedhe.
Paran angenanrika sakjerone Rika lungguh ana ring Dewan Kesenian Belambangan (DKB)
Sing akeh kepinginanisun. Isun kepingin DKB (Dewan Kesenian Blambangan) iki bisa nggawe cathetan (dokumentasi) kabeh gendhing hang wis digawe lan direkam. Dadine kadhung ana wong arep takon sing bingung nggoleti merga dokumentasine wis ana ring DKB.
Muga kelaksan paran hang arep Rika gayuh Kang… Amin
(Moh. Syaiful)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.