AI lan Menungsa Rebut Bucung Nggawe Puisi
Antariksawan Jusuf (dipublikasikan pada Selasa, 29 Oktober 2024 08:37 WIB)
- Laporan
Kelawan majune teknologi lan anane Akal Gawenan (Artificial Intelligence - AI), endane mesin bisa ngalahaken menungsa ring urusan nggawe karya sastra? Endane penyair mbisuk hing diperlokaken merga mesin bisa nggawe puisi?
Jawaban hang nggawe lega teka dosen ilmu komputer Universitas Indonesia, Dr. Riri Satria, "Using."
Riri dadi salah siji pembicara ring seminar Jambore Sastra Asia Tenggara (JSAT) hang dianakaken Pemda Banyuwangi lan Dewan Kesenian Blambangan (DKB) 24-26 Oktober sore.
JSAT nerbitaken buku 200 puisi hang temane Ijen Purba, Tanah, Air, Batu hang dikurasi teka 800 judhul hang diterima panitiya.
Ring dina pungkasane, ana seminar hang seliyane Riri, ana penyair senior D. Zamawi Imron, Kepala Balai Bahasa Jawa Timur Dr. Umi Kulsum, Sofyan RH Zaid, sasterawan teka Medura. Seminare dimoderatori ambi penyastera hang cilikane tau urip ring Banyuwangi Dr. Tengsoe Tjahjono, dosen ring UM Malang lan tau mulang ring Universitas Hankuk, Korea.
Sakteruse Riri doktor ilmu komputer lan dosen komputer ring Universitas Indonesia iki ngomong Akal Gawenan hing bisa ngelebihi kemampuan sastera menungsa.
"Mangkane tetepa nggawe kreasi lan merujukaken sastra," jare Ketua Komunitas Jagat Sastra Milenia (JSM) hang uga Komisaris Utama PT. Integrasi Logistik Cipta Solusi (ILCS)/Pelindo Solusi Digital (PSD).
"AI hing bisa dadi penyair hang sakbenere," jare Riri.
Dene Sofyan RH Zaid lebih mbeliyaki isine buku antologi Ijen Purba: Tanah, Air dan Batu.
"Hang paling akeh ngomongaken penambang belerang: dualitas paradoks. Nambang belerang iki dadi penggaweyan hang paling mbelaeni taping uga nduduhaken semangat hing gelem nyerah."
Jare Sofyan kahanan para penambang gedigu iku setemene akeh kedaden nang wong liya yaiku setemene kepaksa nerima penggaweyan hang ana.
"Iki padha bain ring wektu kang padha, nduduhaken kelebihan lan kekurangan."
Sofyan niteni lan nyathet paran bain hang ana ring buku. Iyane nyimpulaken seliyane
fenomena geologi, ana10 tema hang dadi wigatine penyair:
1. Sepasang penemu ijen
2. Ijen dan vulgar
3. Api biru dan mata ibu
4. Ijen dan warisan kolonial
5. Romantis
6. Ingin paling banyak penambang
7. Ijen adalah aku
8. Masakan ijen
9. Sampah wisatawan
10. Berterimakasih pada ijen
Penyair senior teka Medura D. Zamawi Imron hang kesuwur kelawan aran Celurit Emas, ngomong gok (donya iki) dudu mung puisi. Puisi iku mung cendhela kanggo ndeleng.
"Endahe suling ana ning njero ati dudu teka jajange."
Seminar JSAT dianakaken ring gedung Swarna hang bengen dadi gudang kopra/gedhang tepak pelabuhan Boom magih jaya-jayane minangka panggonan kapal sandhar sak perlu ngangkat asil bumi hang arep diekspor nyang Australia.
Saiki teka njaba magih katon gok iku bangunan kuna taping ring njerone wis dibecikaken hing katon nyawa tuweke. Ring sandhinge didadekaken cafe. Sayange tepak acara seminare sore diganggu ambi latar mburine arupa keber cemeng lan mik hang bolak-balik mati. Sampek disindhir ambi Pak Zamawi, "Kadhung mike magih gedigi, jambore sastra sekolah aja dianakaken wis."
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
