Andung Andung Cafe & Gift Shop

Eko Budi Setianto (dipublikasikan pada Sabtu, 02 April 2022 09:51 WIB)
- Wisata

Gesah sak kancaan ambi ududan lan ngopi, kaya-kaya wis dadi kebutuhane wong-wong lanang saiki. Sak liyane kanggo nyambung silaturrahim lan sak derma omong-kelamong sak kancaan, acara ngopi bareng kaya iku wangune wis mangkat dadi kebiyasahan. Mulane saiki iki ring sak ubenge kutha Banyuwangi wis akeh warung utawa café hang bisa dadi jujugan.

Salah sijine yaiku Andung-andung Café & Gift Shop hang ana ring Desa Tamansari, Kecamatan Licin. 

Nong café hang buru dibukak ulan Januari kepungkur iku, enak seru dienggo gesah lan wis akeh didhemeni ambi wong Banyuwangi.  

Enak lan hing mboseni, gedigu jare uwong-uwong hang wis tau merana. Nggarai betah merga tata-dekorasine ngawinaken antarane sesawangan tradhisional lan moderen. Hawa adhem dhaerah kecamatan Licin lan latare hang dietap asri, kaya-kaya njangkepi enake gesah sak kancaan utawa ambi keluwarga. Paran maning, angger dina Sabtu lan Minggu, ana suguhan musik lan penyanyi Banyuwangi. 

Jare manajer-e, Kang Rohim Aji Saputra, sakat buru dibukak sampek saiki iki sabendina wis akeh ditekani uwong. Akeh-akehe, pengunjung padha teka wayah madhang raina sampek bengi. “Kadhung pemandhangane, hang paling apik ya wayah samarwulu, ngarepaken Magerib. Teka panggonan ngopi hang nong ndhuwur (lantai loro) uwong bisa tumakninah ndeleng langit kulon hang maneka warna (aurora),” ujare.

Sak liyane nyedhiyani kuliner tradhisional Using lan nasional, jare Kang Rohim Aji Saputra, Andung-andung Café & Gift Shop uga nyedhiyani penginepan (home stay) lan maneka kerajinan asile produk UMKM Banyuwangi.

Minggu kepungkur, salah sijine artis penyanyi Ikawangi Jakarta, Jamil Segara, uga nyumbangaken suwarane nong kono. “Panggonane enak, nggarai pernah lungguh-lungguhan ning kene. Iki keneng dienggo langganan,” jare Jamil, hang aseli Lare Licin.

Ndeleng tamane hang dietap asri, dilengkapi banyu mili nong tengah-tengahe, uga nggawe Kepala RA Baiturrahman, Darmawati, S.Pd., kepincut. “Byek, wangune lalare murid-muridisun padha dhemen kadhung diejak memengan merene. Nak Hun program sulung,” ujare. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.