Angen-Angen Methik Wohe Pelatihan Pacul Gowang

Antariksawan Jusuf (dipublikasikan pada Senin, 30 Agustus 2021 07:56 WIB)
- Opini



Lahan tepat untuk iklan anda di sini.

Hubungi: skb@belambangan.com atau WA telp 0811843457


Magih enget yara, ana unen-unen: woh-wohan hang dipethik mbisuke iku, wijine kudu ditandur saiki.
  Gedigu pisan hang sore dilakoni ring lalare hang milu Pelatihan Macaan Pacul Gowang ring Pelinggihan Dinas Kebudayaan Pariwisata. Ibarate lalare iki wiji hang ditandur hang mbisuke bisa nguwoh lan ndadekaken kesenian Pacul Gowang hang saiki rada kingslep bisa merujuk maning.
   Sakat ditinggal Pak Aljin hang wis ngawiti kesenian Macaan Pacul Gowang, kesenian iki taun 1970an lan ndadi taun 1980an, kesenian iki kaya kurang bengsine.
   Hang magih nerusaken ana Pak Misran, hang sore milu dadi narasumber lan nyeritakaken pengalamane. Alae sore iku Pak Misran sambatan sikile lara, sarta dikongkon milu cerita pengalamane, malah bisa njuged nong ngarepe lalare. Sakkal aron! Pak Misran uga kecathet minangka pegiyat Pacul Gowang hang nambahi sithik-sithik unsur ring kesenian iki, kayata nambahi kubung kaya ring kesenian janger. Mangkane hing maido kadhung aran keseniane ya diuwah sithik: Macaan Pacul Gowang Campur Sari Gaya Baru.
Pak Misran iki bengen ya tau kecaruk ring Hadrah Caruk hang nampilaken Pak Aljin ambi grupe iyane.
   Sak liyane Pak Misran, ana Kang Jubaidi hang bengene milu grupe Pak Misran. Naming merga ana hang dirasa hing cocog ambi Pak Misran, iyane ngedegaken dhewek grupe, hing ana arane husus. Teka grupe Kang Jubaidi iki ana ruwahe Kang Ahmad Sarbini hang ngedegaken grup dhewek ring Aliyan Rogojampi hang diarani Macaan Pacul Gowang Sekar Wangi.
   Saiki ana generasi peneruse yaiku Kang Ali Kenthus lan Slamet Penyet hang magih ulih tanggapan merana merene nggawa kesenian iki.
   Sore iku sak liyane Pak Misran, Kang Kenthus, Kang Penyet ditambah Kang Ikhwan (hang setemene pengudang gandrung) hang dadi nara sumber utama ring Pelatihan iku.
   Jak telon iki nduduhaken kelawan praktek ring ngarepe lalare, kelendi ngawiti maca Lontar Yusup, kelendi carane paculan hang diselipi senggakan hang emeh kabeh nganggo basanan lan sithik wangsalan, kelendi carane laik-laikan.
   Ring bungase dina, lalare dikongkon nggawe grup, latihan munggah genjot. Masiya mung rong dina Pelatihan, lalare mau wis nduduhaken gok wiji Kesenian iki setemene wis merujuk lan subur lan bisa diarepaken mengarepe gok Banyuwangi lan sapa bain, bisa nganteni arep methik uwohe. Lalare hang milu iki mula dudu lalare hang kosongan teka kanane. Lalare iki akeh hang wis milu dadi anggotane Lalare Orkestra, milu Pelatihan sindhen kapanane, milu grup Macaan Milenial lan kesenian Banyuwangi ibarate wis dadi sega jangan uripe. Hing maido tepak tampil, akeh hang ewer dadi saingane Kang Kenthus lan Kang Penyet. Kari sithik, ditambahi emes-e, uwohe marek iki wis mesthi gelantongan kari methike.
   Muga-muga hang dikarepaken ring proyek Revitalisasi Sastra Lisan iki ketemu ring tujuwane.
   Ring dina pungkasan Pelatihan iku, merga cawe-cawene Dinas Kebudayaan dan Pariwisata, para peserta lan penyelenggara teka Kementerian Pendidikan, Kebudayaan, Riset dan Teknologi yaiku teka unit kerja Badan Pengembangan dan Pembinaan Bahasa, satuan kerjane yaiku Pusat Pengembangan dan Pelindungan Bahasa dan Sastra, disuguhi tari gandrung teka grup Uni Using pimpinane Haidi Bing teka Kemiren lan penutupe grup hadrah Laras Wangi pimpinane Sajidi teka Glagah.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor