Arsitektur Masarakat Using Banyuwangi (Bagiyan 10)

Antariksawan Jusuf (dipublikasikan pada Jumat, 21 November 2025 07:01 WIB)
- Opini

Arsitektur Masarakat Using (Bagiyan 10)
Ditulis ring Arif Wibowo

Tatanan Lansekap Has Wong Tani Using

Bisa diarani kadhung wong Using iku aseli wong tani lan uripe sing adoh-adoh ambi teradhisi tani.
   Adat lan teradhisine ya lair teka aktipitas pertanian. Mula iki kabeh diaruh-aruhi ambi anane alam lan lingkungan panggonan uripe wong Using hang subur lan cocog dienggo nandur pari.
   Paktor alam ngaruhi budaya, cara mikire lan cara urip masarakate.
   Ematena adat lan teradhisi hang merujuk ring masarakat Using, kaya Seblang lan Kebo-Keboan, hang jelas iki salah sijine wujud sukur masarakat petani nyang Dewi Sri hang wis nguwani keselametan sak suwine nandur pari sak dawane siklus setaun.
   Semono uga keseniyane, kaya gandrung hang lair teka adat seeblang lan angklung caruk hang lair teka teradhisi nggampung pari wong bengen hang biyasah nganggo angklung paglak. Iki nduduhaken kadhung pertanian iku duwe peran hang penting kanggo uripe masarakat Belambangan.
   Umume ring desa-desa sak ubengane tanah Jawa, hususe Jawa bagiyan njero hang kenthel ambi teradhisi tani, desa-desa diubengi ambi lemah subur hang diperujuki pari kanggo nyukupi pangane wong sak kampung.
    Paran maning ning Jawa pucuk wetan  kaya dene ring Banyuwangi hang kesuwur subur lan cocog kanggo tanduran pari sakat jaman Majapait.
   Desa-desa Using ring Banyuwangi mula manggoni wilayah hang murah banyu mili. Kaya kang wis diomongaken ring ndhuwur, kadhung karakter desa Using iku rapet umah taping kadhung mingser minggir teka desa, aran sawah gemelar wera lan subur ngelibengi rapete umah ring tengah perkampungan.
   Gemelare sawah ibarat dadi pagere desa antarane desa siji ambi desa liyane. Pager desa hang arupa lemah subur iki diolah lan dimanpaataken kanggo kelangsungan uripe menungsa yaiku nyukupi pangan.
   Lansekap alam rupa sawah sing mung nduweni arti lemah subur lan ngasilaken pangan bain, taping lebih teka iku wong Using duwe tanggung jawab kelendi urip iki dadi seimbang lan harmonis antarane menungsa lan alam uga antarane menungsa ambi mahluk liyan (danyang desa) hang ana ring sak ubenge desane.
   Iki hang dimaksud arane nilai spiritual hang jeru hang ana ring alam pikire wong Using ngenani alam lan manpaataken alam ring sekitar desane.

(Ana terusane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.