Badan Bahasa Ngerangkul Komunitas Kanggo Nguri-uri Basa Dhaerah

Antariksawan Jusuf (dipublikasikan pada Rabu, 11 Desember 2024 06:59 WIB)
- Laporan

Kepala Badan Pengembangan dan Pembinaan Bahasa (Badan Bahasa) Kementerian Pendidikan Dasar dan Menengah E. Aminudin Aziz ngomong gok Badan Bahasa ngerangkul komunitas kanggo njaga lan nguri-uri basa dhaerah.
   "Iki carane kene kanggo nyurung semangat, dadine basa lan sastera dhaerah hing mara-mara muspra merga ana komunitas hang njaga," jare Pak Aminudin.
   Sore iku ana 9 komunitas sastera lan 6 komunitas Literasi hang diundang tampil ring iwuh hang diarani Pentas Karya Komunitas Sastra dan Literasi Nasional 2024 hang dianakaken ring Graha Bhakti Budaya Taman Ismail Marzuki (TIM) Jakarta.
   Banyuwangi, diwakili Kampoeng Batara teka Papring, Kalipuro, nggelar Macaan Lontar Yusup hang diiringi ambi tampilan jugedan kaya gandrung, jaranan lan tari kontemporer.
   Sakat pirangane taun, Badan Bahasa nggelar revitalisasi kanggo nguwataken basa dhaerah sak Indonesia. Kabehe ana 97 basa dhaerah hang dijejegaken kelebu ring Jawa Timur ana basa Medura lan basa Using.
   Taun ngarep ditambah dadi totale ana120 basa hang arep direvitalisasi. Taun-taun mengarepe jumlahe terus diunggahaken.
"Diarepaken, penutur basa dhaerah saya gayap nganggo basa dhaerah dadi bisa ngerim musprane," jare Pak Aminudin.
   Mula kadhung hing diuri-uri, dienggo saben dinane lan diwarisaken nang anak putu, basa dhaerah suwi-suwi bisa ilang.
   Seperene ana 11 basa dhaerah hang gemet yaiku basa Tandia ring Papua Barat, basa Mawes Papua, basa Kajeli utawa Kayeli Maluku, basa Piru Maluku, lan bahasa Moksela Maluku. Aju ana basa Palumata Maluku, basa Ternateno Maluku Utara, basa Hukumina Maluku, basa Hoti Maluku, basa Serua Maluku, lan basa Nila ring wilayah Maluku.
   Sakat taun 2023, Badan Bahasa ngelungaken bantuwan kanggo komunitas-komunitas sastera hang milu nguri-uri basa dhaerah.
   Bantuwan pemerintah kanggo nguwataken komunitas sastera ana macem loro, yaiku fasilitasi komunitas sak gedhi-gedhine 150 juta lan penghargaan kanggo komunitas/wong (sastrawan) hang gedhine Rp25-40 juta kanggo wong hang wis nggelibet ring donya sastera paling sirhik 40-50 taun.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.