Banyuwangi Jaman Bengen: Sepidhah Udhut (1 teka 2)

Antariksawan Jusuf (dipublikasikan pada Selasa, 09 Januari 2024 08:47 WIB)
- Esai



Banyuwangi Jaman Bengen

Ditulis ring Bapak Abdul Hamid.

Taun 1950an ning Banyuwangi, ana istilah "picis Jepang" hang nduwe konotasi "regane lebih murah" utawa "barang murahan" (nawi kadhung saiki padha ambi gawenan Cina, barange hing patiya apik taping regane murah).
   Jaman semono, paran-paran hang ana buntute aran Jepang, artine negatip. Merga Jepang kalah perang 1944. Lan mula barang-barang teka Jepang akeh barang palsu lan kuwalitase elek lan dianggep ringkih.  Bida kahanane ambi saiki.
   Taun 50an, kaya ring bagiyan Indonesia liyane, barang-barang akeh teka Eropa. Awal taun 60an, Jepang mangkat dodolan sepidhah udhut (sepidhah montor), masiya akeh hing payune merga kalah kuwalitas ambi udhut gawenan Eropa. Dadi ring Banyuwangi ana Yamaguchi, Tohatsu lan Honda. Taping Jepang bisa adol kelawan rega murah sebab akeh komponene digawe teka atom (sedurunge ana pelastik kaya saiki. Atom iki gampang pecah. Garu atom Jepang gampang thuklung).
   Hing maido, jaman bengen ana ungkapan: "Endane larang gedigu, nawi picis Jepang ya?" Polae kawitane Jepang njajah, ngetokaken picis Jepang, barengan ambi picis Landa hang ana. Picis anyar Jepang akeh nol-e (nilaine lebih murah).
   Ring kawitan taun 1960an, merek-merek sepidhah udhut hang seliweran mung sithik. Kayata Yamaguchi, Tohatsu, Miyapet, Toyopet, Suzuki, Ducati, Puch,  DKW, Zündapp, Vespa, Lambretta, Amo.
   Jaman bengen, kapasitas mesin montor gedhi-gedhi. Honda 50cc buru njumbul taun 1964. Sepidhah montor 50cc buru ana ring dalan-dalan Banyuwangi taun 1958, hang paling sulungan Ducati. Sedurunge akeh-akehe cc-ne gedhi, 300 cc, lan wis ngerambah dalanan Banyuwangi sakat taun1947. Umpamane BSA, Norton, AJS, Ariel, Matchless, Puch, DKW, Jawa, Triumph.
   Merga sepidhah montor kelebu teknologi anyar, regane ya larang. Hang nganggo mung wong-wong sugih Banyuwangi.
   Jaman semono, jaman SMA Banyuwangi taun 1964, kakang-kakang hang duwe bromfit (sepidhah montor 50-100cc) gampang nggolet bakal wadonan, laris temenan, digonceng pamer muteri Banyuwangi.

(Ana sambungane bagiyan 2)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor