Banyuwangi Jaman Bengen: Sepidhah Udhut ( bagiyan 2)

Antariksawan Jusuf (dipublikasikan pada Rabu, 10 Januari 2024 08:19 WIB)
- Esai

Banyuwangi Jaman Bengen (bagiyan pungkasan teka rong tulisan)

Ditulis ring Bapak Abdul Hamid

Jaman bengen, sepidhah udhut nggawe mesin 2 tak yaiku bengsine langsung dicampur oli. Aju njumbul mesin 4 tak (bengsin kepisah ambi oli) tepak jamane Honda taun 1964an.
   Ring Banyuwangi, bengen ana pom bengsin Shell pas ning seberange toko Njoo/Toko Limo/Bata. Pom bengsin iku durung nganggo listrik dadi dikumpa ambi tangan saben taningan 5 liter, dadi saben wong kudu tuku tikelan 5 liter.
   Pom bengsin listrik buru ana Stanvac taun 1960an ring wetane terminal (stanplat).  Hang pom bengsin Shell hing payu aju tutup. Tepak iku anane oplet (kendaraan penumpang umum) jurusan Rogojampi, Licin lan Wongsorejo.
   Bis hang arah luar kota, ana jurusan Banyuwangi-Jember nganggo Damri (pemerintah) lan Intern (swasta). Wektune kira-kira 5-6 jam.
   Jaman bengen, bis hang kothor diumbah ring Talun (saiki Untag). Sedurunge, panggonan ngumbah kendharaan kothor ana ring saluran banyu Tegalloji ring ngarepe Kantor Pos lan seberange toko IE/Soponjono.
   Mung anake wong sugih-sugih hang bisa nunggang sepidhah udhut. Tepak taun 1950an, ning Banyuwangi ana sepidhah udhut ndhuwure 150cc. Isun hing duwe, taping kerana ngelithis, mulai umur rolasan isun bisa nyetiri sepidhah udhut gedhi Eropa BSA, AJS, Jawa, Puch, Zündapp, BMW, Harley. Buru taun 1974 isun bisa tuku kredit sepidhah montor Honda 125cc ning Jakarta.
Isun mung ngomplong thok, duwe sepidhah pancat, roncodan tepak marek kantor malaria Kopem kobongan 1962. Taping ya bisa nggonceng bakal (saiki rabinisun) teka Banyuwangi nang Meneng pp. Goncengane wesi, ngecap nang bokong serang adohe.   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.