Cathetan Juri Cerita Cendhek SD Festival Literasi Using 2024
Nur Holipah (dipublikasikan pada Kamis, 07 November 2024 10:40 WIB)
- Laporan
Mung lare selikur hang miloni lomba Nulis Cerita Cendhek, Festival Literasi Using, Sabtu 2 Nopember 2024 sore, makili kecamatane. Petang kecamatan teka selawe hang sing nguntup: Wongsorejo, Purwoharjo, Glenmore, lan Kalibaru.
Taun iki, mula Nulis Cerita Cendhek katut dadi bidhang hang direvitalisasi Badan Bahasa liwat Balai Bahasa Provinsi. Enem bidhang liyane hang direvitalisasi yaiku Ndongeng, Maca Tulis, Pidhato, Ngewer, Nembang lan Nggawe Puisi.
Lare selikur nulis cerita cendheke nung kertas folio hang buru diedumaken ring panggon lomba merga temane ya buru dilotre sakmarine pembukaan. Setemene, ring juknis ya wis disampekaken gok tema cerita hang dienggo lomba ana telu: kesenian, wisata lan kuliner. Mesthine lalare wis latihan telung tema iku teka ngumahe.
Telung jam suwene lalare nulis, ulih gedrik utawa latin. Selikur judhul gadug nyang mejane juri. Mungne, ana petang judhul/tulisan hang sing bisa dibiji merga sing kelebu cerita cendhek. Petang judhul iku isine dadi artikel populer. Mung njelasakaen kahanane Banyuwangi hang sugih adat tradhisi lan kuliner kelawan lurus, lempeng, campak nana ragine. Alihe, Cerita Cendhek kudune ana bagiyan pengenalan/orientasi, masalah/konflik, penyelesaian/solusi. Umume ceritane ya rekaan (apen-apen), fiktif, hing kudu temenan kedadeyan. Setemene bain nulis nganggo pengalamane dhewek, hing masalah. Taping kudu bisa ngolah lan ngerageni. Hing paran-paran yara, umpamane nulis teka hang dialami dhewek, taping diaranaken wong liya? Hing ana hang menging, hing ana hang nguwel.
Ana hang sakdawane tulisan sing gancang ketemu lakone. Alihe anane lakon dadi sarat intrinsik cerpen. Yong lakon hang bisa nguripaken alur cerita.
Ring tema kuliner, lalare pungkasane mung mbolan-mbaleni gok (upamane) Pecel Pitik iku enak. Durung dijelentrehaken kahanan bangete olah iku kelendi. Makene hang maca iki kaya kegawa utawa milu weruh kaya-kaya methetheng pitike ring ngarepe mata.
Bisa-a, anane masalah/konflik diceritakaken kelawan mucit sampek hang maca kaya milu wedi, milu kuwatir, milu nangis lan miku kegawa, serang lancare penulis nggambaraken ring cerita miji-miji.
Ring tema wisata, emeh kabeh lare ngawiti ceritane gedigi: ‘Dina Minggu isuk, isun, emak lan apak.....’ Alihe nulis cerita wisata, hingana aturan gok kudu latar dina Minggu yara?
Judhul ya gedigu pisan. Kadhung bisa milih judhul cerita aja langsung nduduhaken isi. Goleta judhul hang nggarai hang maca penasaran lan merasa dikejutkan.
Aju aja lali, isi cerita, ya kudune hang pantes kanggo jenjang umure. Umur SD, kudune isi ceritane hing adoh-adoh teka ‘dunia anak’. Kadhung cerita hang ditulis lalare/usia anak-anak, tapi ana nyebut ‘pudhot njaluk maruwan’ masiya mung dikarepaken dadi bab pengenalan, kerasane wagal. Uga iki ngurangi biji.
Juri mbiji telung macem, 30% Tema lan Alur, 40% Unsur Cerpen, 30% Keterbacaan & Ejaan Basa Using. Selikur judhul saben perwakilan Kecamatan ring Lomba Cerita Cendhek SD (urutan miturut sekor) antarane:
- Dicokot Buto (tema Kesenian, Kec. Kabat)
- Kurangen (tema Kukiner, Kec. Giri)
- Lamuke Jaranan Mondoluko (tema Kesenian, Kec. Glagah)
- Panganan hang Bida ambi Liyane (tema Kuliner, Kec. Banyuwangi)
- Pesisir Boom (tema Wisata, Kec. Rogojampi)
- Pecel Pitik (tema Kuliner, Kec. Kalipuro)
- Adus-Adusan ring Sendhang Seruni (tema Wisata, Kec. Licin)
- Pelancane Emak (tema Kuliner, Kec. Tegaldelimo)
- Muyab (tema Kuliner, Kec. Cluring)
- Ngelencer ring Banyuwangi Park (tema Wisata, Kec. Blimbingsari)
- Memengan nyang Pantai Boom (tema Wisata, Kec. Sempu)
- Rekreasi nyang Alas Purwo (tema Wisata, Kec. Genteng)
- Jaranan Kesenian Banyuwangi (tema Kesenian, Kec. Siliragung)
- Ndeleng Pethik Laut ring Pesisir Muncar (tema Wisata, Kec. Srono)
- Kesenian Gandrung (tema Kesenian, Kec. Pesanggaran)
- Kuliner Banyuwangi (tema Kuliner, Kec. Muncar)
- Pelisiran ring Alas Purwo (tema Wisata, Kec. Gambiran)
- Pecel Pitik (tema Kuliner, Kec. Songgon)
- Gedhang Goreng Sabun (tema Kuliner, Kec. Tegalsari)
- Sega Tempong (tema Kuliner, Kec. Bangorejo)
- Pantai Boom (tema Wisata, Kec. Singojuruh)
Sakliyane ulih hadhiyah teka Pemkab Banyuwangi, lalare juwara 1, 2 lan 3 ya ulih teka Balai Bahasa Provinsi Jawa Timur ring Puncak Festival Tunas Bahasa Ibu dina iki. Manggon ring Hotel Santika Premiere Gubeng Surabaya.
Mengarepe uga, hang juwara 1, 2, 3 harapan 1 lan harapan 2, arepe diundhang nyang Surabaya maning kanggo Kemah Cerpen Jilid II. Kaya hang wis disampekaken Dr. Umi Kulsum, M.Hum Kepala Balai Bahasa Provinsi Jawa Timur, bangete penutupan Kemah Cerpen kawitan 22-25 Oktober 2024 sabene.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
Sumber : Werta
Editor: Antariksawan Jusuf
