Anggitane: Antariksawan Jusuf
(Minggu, 21 Januari 2024 06:06 WIB)

(Cerita Cendhek) Samsul lan Kopi Abang, Ijo


"Kelendi Lik, serta marek kuliyahe, paca arep milu menganan kopi?" apake Samsul takon nang anak lanange hang lungguh ring pelanca.
   Ring pelanca, emake wis nyepakaken jajan sepiring lan kopi sak lumur.
   Samsul buru diwisuda, sarjana pertanian, jurusan Agrotek. Mesthine ilmune tepak kanggo ngangkat uripe wong tani. Kelendi carane ngunggahaken asil panenan kopi lan ngolah makene asile saya akeh kanggo wong tani.
    Mula sakat sekolah, mung siji kekarepane, kepingin ngelungguhaken nasibe wong tani kopi ring panggonan hang sakmesthine. Ring desane akeh wong tani kopi. Nandur kopi ring tanahe Perhutani, asile wis ana hang nuku. Ring kutha, iyane ndeleng rega kopi sak cingkir ring cafe-cafe bisa padha silur kopi mentak ring desane ulih rong kilo. Kari hing mupakat. Wong tani hang ngadhepi kabeh resikone, ya kadhung ketiga dawa, nyuda ulihe panen, panenane elek, kabeh hang nanggung petani. Masiya njungkel-njungkel saben dina, hang akeh nyirike ya wong hang dagang kopi, utamane cafe-cafe iku mau. Paran maning kadhung jare ketemu dalane ekspor. Kopi-kopi Indonesia, kaya kopi Aceh, Lampung, Toraja, Bali Kintamani, Flores Bajawa, Jawa, Papua Wamena wis kesuwur sak donya minangka kopi hang duwe rasa enak. Jare wong dagang hang bisa ngedol kopi-kopi iki sampek negara manca bisa dadi enak uripe merga dituku ambi picis dolar. Sampek kesuwure kopi Jawa, ana program komputer hang diarani Java, iku merga hang nyiptaaken programe tepak golet aran ndeleng ring ngarep bacote ana sak cingkir kopi teka Jawa, ya iku bain wis hang dienggo.
   Kopi Indonesia mula bisa dadi andhelan sakat jaman Landa bengen. Mula Landa hang ngawiti nandur lan asile teka Indonesia diedol nong Eropa. Naming penduduk aseline mung dikongkon dadi buruh ring kebon kopi. Hing tau diajari kelendi carane ngolah kopi makene bisa diedol lebih larang.
   Sampek seperene wong tani kopi magih ngundhuh panenan campur woh kopi hang ijo, kuning, lan abang.
   Wong tani kadhung diengetaken dikongkon manen hang abang-abang, bisane mung semaur entheng: "Halah, hang campur ambi hang abang thok regane mung kacek rong ewu." Iku merga wong tani hing gelem ngolah dhewek asil panene. Regane dadi murah merga tenagane iyane lan keluwargane hang milu nulungi hing tau diitung.
   Samsul wis tau ngomong nang camat, dikongkon ketemu ambi kelompok-kelompok tani lan kabeh hang kesenggol bisnis kopi, sampek pak Camat ngewani dalan ngedegaken Badan Usaha Milik Desa (Bumdes) sak perlu kanggo nuku panene wong tani lan ngewani utangan hang anakane hing patiya nekek gulu.
   Cumpu wong tani magih sara arep menyang Bumdes. Tepak ditakoni Samsul semaure: "Sing enak ambi Pak Aji hang seperene suwene wis kerep mbantu ngewani utangan, tepak lalare melebu sekolah, tepak lalare sunat sampek umah-umah. Geningena panenane Hun serahaken nyang Pak Aji bain. Uripisun lan keluwarga cukup wis."
   Samsul magih metenggengen. Kopi lan jajan hang wis sakat mau dicepakaken emake taker adhem. Kelendi arep semaur nyang apake?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf