Destinasi Wisata Rakyat Sesehan Diterak Pageblug
Antariksawan Jusuf (dipublikasikan pada Kamis, 15 Juli 2021 16:00 WIB)
- Wisata
Aja maning ana PPKM darurat hang maksa Pemerintah Daerah Banyuwangi nutup 78 destinasi wisata hang ana ring telatahe kabeh. Sedheng sedurunge ditutup bain akeh panggonan hang sesehan diantem pageblug iki.
Tuladha hang parek bain panggonan hang parek ring kutha Banyuwangi yaiku Alas Sumber Manis hang ana ring Suko lan Puncak Asmoro hang ana ring Gombeng Kalipuro.
Alas Sumber Manis hang duwe wit mahoni dhuwur-dhuwur lebih 15 meter setemene hing kalah apike ambi alas wit trembesi hang ana ring Djawatan Benculuk. Kadhung hang ring Djawatan katon kaya wit-witan jaman kuna makuna bengen, Alas Sumber Manis ngatonaken kahanan romantis hang cocog dienggo poto-poto jak loron. Bandhingan antarane wong lan wit-witan hang seru dhuwure, ndadekaken obyek potone kaya percil ring antarane sikile buta raksasa, naming merga werna godhong ijo hang kerep, sunare serngenge hang sithik-sithik nembus ngeliwati godhong lan carang wit-witan, ndadekaken kahanan hang apik. Paran maning kadhung obyek potone nganggo kelambi werna barak, dadi bisa kontras ambi ijone godhong, dadi potone apik seru. Alas Djawatan mula menang parek lurung gedhe dadi gampang jujugane. Dene Alas Sumber Manis masiya dalane aspalan apik taping dudu liwatan wong saben dina. Saiki alas iku ya mbalik mung dadi alas mahoni hang dienggo liwatan wong golet suket lan panggonane wong sak ubengane golet rambanan. Siji-sijine warung hang ana ring ngarep parek parkiran tutup. Wis hing katon aran menungsa hang poto-poto ngeregani endahe gawenane Gusti Pengeran. Katon sintru masiya raina.
Dene Puncak Asmoro ya padha ngenese. Destinasi iki kelebu jujugan hang dikembangaken ring rakyat. Panggonane apik ring puthuk ring antarane wit pinus. Ambi pemuda kono diendohi pondhok lan panggonan lungguh. Pemandhangane seru apike, ngulon ndeleng gunung Merapi Ungup-Ungup lan nulih ngetan bisa ndeleng segara lan Pulo Bali. Hawane rada adhem lan angine kaya nggawa oksigen teka alas-alas sak ubengane panggonan hang werane rong hektar iku.
Bengen melebune mbayar telung ewu lan parkir montor rong ewu. Sedurunge ana pageblug, emeh saben dina ana wong kelenceran merana, utamane Sabtu lan Minggu. Wong ngelencer nong kene iki bengene bisa nguripi tukang ojek hang kira-kira 25 wong akehe. Kadhung parkir nong Lerek, Gombeng, wong kelenceran iki diateraken ojek lan mbayar 20 ewu bolak-balik. Saben tukang ojek bisa sampek imbal ping sepuluh nggonceng wong kelenceran kadhung tepak rame, jare Hariyono Ha'o, petani kopi hang uga salah siji wong hang milu mimpin lalare enom ring kono nguripaken wisata Puncak Asmoro. Pak Anas bain tepak magih dadi bupati tau digonceng Hariyono mendhuwur milu ndeleng panggonan Puncak Asmoro.
"Saiki tukang ojeke wis mbalik nong kebonan lan ibuk ambi rajakayane," jare Hariyono.
Muga-muga pageblug iki gancanga uncal makene jujugan wisata ring Banyuwangi hususe bisa urip maning lan nguripi wong-wong hang manggon ring pareke kono.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.