Ethek-Ethek lan Ilmu Pengetahuan
Slamet Hariyadi (dipublikasikan pada Rabu, 18 Januari 2023 07:51 WIB)
- Opini
Ethek ethek ethekan, usum usuman
Lare memengan, njaluk sampek tangisan
Ethek ethek ethekan, gemandhul loro
Kadhung memengan, tangane sampek abuh
Aja sampek rika kaya ethek ethekan
Dienggo memengan, gentus-gentusan
Mumpung-mumpung nggoleta kepinteran
Aja sampek rika cakar-cakaran
(Cipt. Ayong Laros. Voc: Danang)
Ethek-ethekan (Latto-latto, Katto-katto, Clackers Ball) usum maning. Menganan jaman cilik lare taun 60-an mulai muncul rame ring endi-endi. Taun kawitan 2000an sampek digawekena gendhing ambi Kang Ayong hang dinyanyekaken Danang tepak magih cilik.. Saiki lare-lare sekolah padha tuku dienggo menganan seru-seruan ambi kanca-kancane. Kadhang tandhing suwi-suwian. Ana hang tandhing modhel gayane ngerethek. Embuh teka endi kawitane usum, mara-mara sak Indonesia wis kemerethek merana-merene. Pak Presiden Jokowi bain sampek milu-milu nyobak ethek-ethek.
Ethek-ethek sakjane menganan hang nganggo ilmu fisika. Kawitane ethek-ethek digawe kanggo mbuktikaken hukum Newton, mangkane diarani Newton's Pendulum Ball Swing. Mayo ngenget-enget ilmu Fisika jaman sekolah bengen. Hukum III Newton unine, "Ketika suatu gaya (aksi) diberikan pada suatu benda, maka benda tersebut akan memberikan gaya (reaksi) yang sama besar dan berlawanan arah dengan gaya yang diberikan". Dadi bangete ethek-ethek digoyang-goyang, pentholane monthal-manthul, ahire padha ngantem pentholan liyane, dadi pating tabrukan. Rumus momentum gedigi (p = mv), artine kerono momentum (P) dipengaruhi ambi massa (m) lan kecepatan (v), ahire pentholan-pentholan mau bisa tabrakan bareng seimbang kadhung duwe massa hang padha.
Lalare hang memengan hing kira sampek mikir seperono. Alae kadhung saben memengan bisa ambi belajar teorine, tambah bisa nambah pengetahuane lalare hang sekolah. Kayata menganan “Temekeran”, nganggo hukum gerak benda (kelembaman) lan momentum (tumbukan), “Pathil-lele” nganggo hukum gerak parabola, “Tepil” nganggo hukum gaya pegas lan gerak parabola. Uga pisan memengan “Tarik Tambang” nganggo hukum Gerak lan Gaya, “Egrang” nganggo konsep energi kinetik lan energi potensial, lan menganan “Pintil” nganggo konsep usaha, energi lan gaya gravitasi.
Sayange hang aran memengan luwih abot seneng-senangane tenimbang njuwut ilmune. Iki dadi Pe-Er para guru-guru ring sekolah lan wong tuwek hang ndhampingi anak sinau. Kudune bisa nggandhengaken antarane memengan hang viral ambi llmu sekolahan. Penting kanggo ngunggahaken kuwalitas Pendhidhikan ring Indonesia, hususe warga Using ring sak kabehane panggonan. Dadi lalare bisa sinau teori sekolah ambi cara seneng-seneng tanpa kerasa kaya belajar ring kelas. Cara gedigi hang diarani Literasi.
Kira-kira paran maning memengan hang bisa digoleti lan dihubungaken ambi ilmu sekolahane? Dakon, Bekel, Selodor, Engklek, Hulahop, Bedhil-bedhilan, Jeg-jegan, Ban-banan, Bom-boman, Dodol-dodolan, Dokter-dokteran, kabeh iki mesthi bisa dihubungaken ambi pelajaran IPA (Ilmu Pengetahuan Alam), hususe ilmu Fisika, Kimia, Biologi, termasuk ilmu Matematika lan pelajaran IPS (Ilmu Pengetahuan Sosial). Memengan tradhisional gedigi bisa ngimbangi lalare saiki hang wis padha kedanan ambi gadget hang sipate maya. Ahire keterampilan motorik organ tubuh (tangan lan sikil) hing merujuk kelawan apik, pikirane kurang kreatip merga gadget mung menganan game hang wis otomatis tanpa mikir kelendi nggawene. Hang obah mung derijine bain. Muga-muga kahanan ethek-ethek iki bisa dadi wayah hang pas kanggo nyemangati lalare generasi sekolah ngelatih motorik kanggo mangsa mengarepe.
(Kang Slahar)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.