Festival Hadrah sak Jawa Timur ring Mesjid Cheng Ho

Moh. Syaiful (dipublikasikan pada Sabtu, 30 Juli 2022 08:23 WIB)
- Laporan



Nubengi nepaki malem siji Sura utawa 1 Muharrom 1444 tepak ring dina Jemuwah tanggal 29 Juli 2022 manggon ana ring Aula Yayasan Masjid Cheng Ho Banyuwangi ring Kelurahan Sumberejo Kecamatan Banyuwangi nganakaken Festival Hadroh Albanjari Kreasi sak Jawa Timur. Kegiyatan iki mula digelar kanggo mengeti tekane taun anyar yaiku taun Hijriyah 1444 utawa tekane Ulan Sura ring taun iki.

Festival Hadroh Albanjari Kreasi hang dikawiti taun iki dikarepaken dadi kawitane agenda rutin hang arep terus dianakaken masjid Chenghoo Banyuwangi hang saiki mulai aktip maning sakjege dicekel ambi H. Muhamad Kadafi Kadiso hang dadi ketua dewan pembinane. Festival Hadroh Kreasi Albanjari iki dikarepaken sakliyane kanggo siar Islam ring Banyuwangi uga duwe penggayuhan bisa njaga tradhisi Banyuwangi utawa gendhing-gendhing salawatan Banyuwangi, mula  iku sarat utamane ana ring pestipal iki kabeh peserta lomba kudu nggawa siji gendhing utawa timpalan asli Banyuwangian kanggone kreasi Al-Banjarine.

Lahan tepat untuk iklan anda di sini.

Hubungi: [email protected] atau WA telp 0811843457


Brother Mothy ketua Yayasan Haji Muhamad Chenghoo Banyuwangi ring sambutan pembukaane pestipal milu girang merga Masjid Chenghoo wis gelem nganakaken kegiyatan kesenian lan marek-marekaken seni lan agama kaya dene para penyebar agama Islam ring  kawitane Islam melebu ring tanah Jawai iki.

Sakteruse Ketua Yayasan Haji Muhamad Chenghoo Banyuwangi iki ngajak nyang umat Islam Banyuwangi terus marekaken antarane seni lan agama liwat kesenian hadrah iki, kaya dene hang wis dilakoni para wali ring jaman bengen, kayadene Sunan Kalijaga lan Sunan Bonang.

Ustad Haris Setiawan hang dadi Ketua panitiane nerangaken kadhung peserta hang wis nyatakaken sanggup milu pestipal iki ana dhung 28 peserta hang arep dibiji nyang juri ahline Al-Banjari hang ditekakaken teka njaba Kabupaten Banyuwangi, kaya juri teka Jombang, Malang lan Sidoarjo. Masiya kegiyatan iki dadi kegiyatan kawitan hang arep dienggo pemanasan ring kegiyatan Tablig Akbar tanggal 25 Sepetember engko, dudu berarti iki mung abang-abang lambe. Naming kegiyatan iki ya sing sukur-sukur kanggone penyelenggarane, merga Festival Hadroh Al-Banjari Kreasi iki uga didhukung komunitas Al-Banjari hang ana ring wilayah Jawa Timur, gedigu Ustadz Haris nerangaken.

Ring pembukaane pestipal dadi tambah rumang merga disokong ambi pagelarane Akademi Lalare Orkestra hang nggawa petang lagu yaiku, Mapag Tamu, Perdamaian, Bang Cilang-cilung, lan Lir-ilir Ulan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Kabar Anyar

Editor: Antariksawan Jusuf