Festival Memengan

Nani Asiany Mustikowati (dipublikasikan pada Selasa, 26 Juli 2022 08:56 WIB)
- Laporan



Isuk- isuk ring Taman Blambangan akeh uwong, lare cilik lanang wadon kang padha nganggo kelambi adat Banyuwangi. Celana lan ndhuwuran kelir cemeng ditambahi udheng kang dienggo wong lanang, lan wong wadone padha nganggo sal kang disetelaken ambi tapihe. Suwara tabuhan lan gendhingan kang wis ngungkung nambahi ramene penonton. Sing sepira suwe selawatan dikumandhangaken ngiringi santunan lare atim, aju diterusaken nyanyi lagu kebangsaan Indonesia Raya. Mari gedigu ketua pelaksana Suratno, S.Pd, MM nguweni pidhato sambutan kang njelasakaen kadhung isuk iku dianakaken pestipal kang kejuluk Festival Memengan. Ring acara iku arep digelar maceme memengan tradhisional utawa memengan jaman bengen kang jarang diweruhi lare-lare cilik saiki.

Ring sambutane, Bupati Banyuwangi Hj. Ipuk Fiestiandani Azwar Anas ngajak nyang wong tuwek supaya ngawasi lan ndhampingi nalika anak-anake hang magih lare mbukak gadget merga tugas iki sing mung tugase pemerintah thok taping uga tugase wong tuwek lan masarakat kabeh. Wong tuwek kudu biyasah ngajak anake supaya gesah bareng (diskusi).  Bupati njaluk supaya lare- lare ring dina iku perei sulung nyekel gadget utawa hp android. Perei sulung memengan game. Tinimbang meneng sing ngobah awak kerana main game bain aluk memengan kaya kang ana ring pestipal memengan. Memengan jaman bengen padha ambi olahraga. Ya sing mung ngobah awak thok kaya pelayonan lan adu otot taping ambi mikir kelendi carane bisa menang. Kadhung wis sering memengan utawa olahraga iku bisa ning awak dadi kesat lan sehat. Penjaluke pisan supaya semangat sinau supaya paran kang dadi cita-citane bisa diwujudaken. Lare Banyuwangi lare kang hebat bisa mongkogena wong tuwek, gurune, lan lingkungane, imbuhe Bupati.

Lahan tepat untuk iklan anda di sini.

Hubungi: [email protected] atau WA telp 0811843457


Pestipal kang dianakaken tepak dina Sabtu tanggal 23 Juli 2022 iku ditepakaken pisan ambi peringatan Hari Anak Nasional (HAN). Maninga, sing mung ketua pelaksana lan bupati thok kang nguweni sambutan. Teka Kementerian Pendidikan, Kebudayaan, Riset, dan Teknologi (Kemdikbudristek) uga nguweni sambutan, nambahi meriyahe acara dina iku. Masiya tawis sambutane liwat virtual, sing teka langsung nyang Taman Blambangan tapi sing ngurangi meriyahe acara pestipal. Hadir nong acara iku anggota DPR, teka Kodim 0825, Polres, lan pejabat liyane kaya kepala dinas, camat, korwilker, lan pengawas sekolah.

Sakdurunge lare-lare ngelakokaken paran bain memengan tradhisional, disuguhaken tarian Kempis, kang taun iki menang juara 1 ring ajang Pekan Cipta Seni SD ring Malang. Tarian iki mula apik seru, paran maning lare kang njuged sing mung sakderma njuged taping ambi nduduhaken ekspresi memengan dadi kodhok-kodhokan. Kang nggarai apik pisan tarian iki dijugedaken ambi lare-lare lanang sedheng kang nabuh lare-lare wadon. Bupati seneng, penonton liyane uga seneng. Kang nonton akeh-akehe lare sekolah. Kadine ana kancane kang njuged apike kaya gedigu ahire seneng kabeh.

Kanggo tampilan pengawit, diduduhaken nyang penonton sebagiyan memengan tradhisional. Ana memengan hulahup, egrang, kelompen dawa kanggo wong telu, montor-montoran, memengan kang disurung nganggo rodha cilik aju kang disurung goyang-goyang.  Ring tengahe tampilan, Bupati dijaluk nyacak memengan-memengan iki. Temakaken milih nganggo kelompen. Ya sedhilut bain nalika diedu ambi lare nganggo kelompen liyane, langsung ketinggalan. Ring acara pestipal iku uga diedum doorprize. Sapa kang bisa njawab pitakonan teka MC kadhung jawabane bener ulih hadhiyah teka bupati.  Ahire acara dipungkasi ambi parade lare memengan kang macem-macem anane iku, lan kang nampilaken murid- murid makili kecamatane dhewek- dhewek. Kaya Kecamatan Banyuwangi kang nampilaken hulahup, Glagah ambi egrange, Muncar ambi tarik dhadhunge, Bangorejo memengan montor-montoran teka sepet lan sakteruse sampek selawe kecamatan tampil kabeh.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor