Gunung Malangsari Kalibaru

Muhamad Novi Yusuf (dipublikasikan pada Jumat, 27 Januari 2023 09:09 WIB)
- Wisata

Dina nduduhaken dhung raina gemuyu girang. Serngenge wis mbeliyak mega hang ngemuli ring wektu subuh. Isun ambi dulur-dulur Glenmore dikongkon siyap-siyap gage adus aju nganggo kelambi hang apik merga arep diejak kelenceran. Isun takon kerana kepingin weruh dhung nak ngelencer nong endi papan panggonane. Dulurisun hang aran Wak Nurul iku kepingin nyambang dulure hang nong Dusun Malangsari Desa Kebonrejo, gang panggonane nong perkebunan kopi. Ceritane Wak Nurul teka rabine yaiku Wak Yuyun Malangsari iku gunung nong dhaerah hang melebu Kecamatan Kalibaru.

Iku mauka hun takoni tepak wis melaku merana ambi nunggang montor. Hun enget-enget dalan hang diliwati mauka. Serang ana kepinginan nawi mbesuk-mbesuk bisa nyang Malangsari maning. Temakaken dalane gampang diapalaken, teka lurung gedhi Glenmore lurus bain sampek Balai Desa Kalibaru. Ring kana ana pertelon hang tengahe ana tugu tangan nyekel uwoh soklat, aju lurus bain sampek Desa Terongan kira-kira 200 meter teka lurung gedhi mauka. Mari digu nututi dalan maning sampek ana pertelon, tetep lurus. Kecaruk pertelon hang kepindho biluk nengen. Ring kana wis katon dalanan arep munggah nong gunung. Kawitan dalane apik, mung serta wis ngeliwati puthuk kawitan, dalane watu rejeng.

Ring kana, wis dianteni penyawangan hang wera, adhem ayem, ambi wujude restoran. Taping wektu isun liwat iku, restorane magih tutup. Dadi ya ambi dulurisun nerusaken laku bain. Serta wis ngeliwati dalan hang kaya nong Gunung Kumitir, ana papan panggonan hang wera nong pinggir gunung. Ana pendhapa cilik uga pelungguhan hang kayane mula digawe pancen. Ambi dulurisun, montore mauka diendheg makene isun bisa nyawang lan mudhun marani papan ngepos iku. Dhonge wis merana, byek. Ati adhem, hawane dherem, mata kaya hing nak ketip. Penyawangan hang semono werane ring ngingsore gunung Malangsari katon apik. Hun tulih sak pinggire gunung iku mula akeh wong-wong hang padha mandheg. Padha kepingin motrek penyawangan uga padha selfie serang apike kahanan nong kono. Papan hang mula kanggo ngepos iku tepak. Kerana bucu kanggo ndeleng penyawangane bisa wera dhung ditulih. Umpama ngelak utawa elom, ring kana wis padha mandheg wong-wong hang dodolan nganggo sepidhah montor.

Ring pikiran njumbul angen-angen. Panggonan iki bakale bisa dadi tambane uwong hang nak munggah utawa mudhun ring Gunung Malangsari. Masiya dalane magih lemah taping dirumat apik. Kadhang magih akeh watu-watu hang nggarai wong ngedhengaken lakune. Isine gunung mauka yaiku perkebunan soklat utawa kakao hang ditandur apik lan dhirik. Sak marine ndeleng sedhilut, aju dulurisun ngajak melaku maning kerana gentenan ambi uwong-uwong hang nak ngempos makene bisa istirahat. Sakdurunge melebu perkampungan temekaken ana pangklang hang uga ring kana ana warung hang nyedhiyani bengsin. Naming kanggo njaga makene hing kentekan, kudu disiyapaken bengsin sakdurunge munggah utawa mudhun teka Gunung Malangsari iku. Maridigu, penjaga mbukak pangklang sakmarine idin ambi nduduhaken KTP.

Perjalanan diterusaken sampek gadug nong umahe dulurisun. Gaduge ring umahe dulure uwakisun mauka, magih enget nong penyawangan Gunung Malangsari mauka. Dalanan Gunung Malangsari keneng dienggo wisata, hang penting nggawene, ngerumate, ambi inovasine bisa nggawe ayem sapa bain. Isun bain wektu magih nong umahe dulure uwakhun, hang sun arep-arep gancanga mulih makene bisa liwat uga nyawang endahe penyawangan sawahan, perkebunan, perkampungan teka Gunung Malangsari mauka.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.