Jambore Sastra lan Nasib Sastra Mengarepe

Antariksawan Jusuf (dipublikasikan pada Senin, 28 Oktober 2024 08:30 WIB)
- Opini

Iwuh Pemda lan Dewan Kesenian Blambangan (DKB) hang digelar 24-26 Oktober sore, ngasilaken buku antologi gurit lan Maklumat, naming hang seru pentinge yaiku paran hang ditinggalaken ring murid-murid sekolah.
   Salah siji programe Jambore Sastra Asia Tenggara (JSAT) iku ana Penyair Goes to school (Sasterawan Sanja Sekolah). Ring kono, akehe 115 penyastera hang teka negara manca, teka dhaerah liya sak Indonesia lan hang teka Banyuwangi dhewek kecaruk ambi lalare ring 32 sekolahan hang semebar ring 17 kecamatan teka pucuk elor Wongsorejo sampek pucuk kidul Siliragung.
   Sanja sekolah iki nggawe kaju emeh kabeh hing mung penyastera hang milu taping hang lebih utama yaiku sekolah lan lare-lare hang kecaruk wong njaba hang bisa ngewani inspirasi lan impen kanggo nguwataken sastera ring dina mengarepe. Dadi JSAT hing mandheg mung semene merga ring tangane lalare hang padha gayap milu acarane, sastera bisa diterusaken, diwarisaken lan nggawe lare dhemen nang sastera.
   Ring sekolah, sakliyane edukasi sastera, para penyair nganakaken permainan sastera lan ngajari lalare nggawe puisi. Malah ana sekolah hang arep nyaring puisine lan didadekaken sak buku.
   Sekolahe ya padha girang lan mongkog ditekani penyastera teka endi-endi. Malah kepala sekolahe dhewek gelem ngampiri wong-wong hang diinepaken ring homestay ring Kemiren.
   Kaya jare Kepala Sekolah MA Mambaul Huda Tegalsari, Kiyai Muhyidin, ring acara iku murid-murid bisa sinau nang para penyair propesional lan ngewani inspirasi kanggo nyiptakaken karya sastera hang nduwe kuwalitas dhuwur.
   Para penyastera iki dudu wong sembarangan, akeh hang nduwe gelar doktor lan akeh hang buku gurite sepirang-pirang. Ana umpamane Rissa Churia wong hang asale Tukangkayu Banyuwangi wis nerbitaken 10 buku puisi.
   Akehe kira-kira 800 naskah teka kira-kira 400 wong hang dikirim nang panitiya aju disaring lan dipilih 200 karya.
   Ana rong penyair yaiku Badaruddin Amir teka Barru Sulawesi Selatan lan Tatan Daniel hang puisine kepilih taping wonge nyulungi mujur ngalor.
   Penyaire teka Malaysia (Johor, Kelantan, Kuala Lumpur, Perak, Pulau Penang, Melaka, Negeri Sembilan, Sabah, Selangor), Singapura, Sumatera (Aceh, Riau, Lampung), Kalimantan, Bali, Medura, Maluku, NTT lan Sulawesi. Dene hang teka kutha ring Jawa macem-macem mulai hang paling parek Jember, Bondowoso, Medura sampek hang adoh Jakarta, Tangerang, Sukabumi, lan kutha-kutha ring antarane Jawa Timur, Jawa Tengah, Yogyakarta, Jawa Barat lan Banten.
   Kuratore (wong hang tugase nyaring) kabeh dudu wong Banyuwangi: Wayan Jengki Sunarta, Mahwi Air Tawar, lan Mutia Sukma.
   Jare Ketua DKB Kang Hasan Basri akehe puisi hang kudu disaring wong telu iku hing cukup wektune kadhung dibiji. Pungkasane, pokoke hang kepilih ambi rong kurator, iku bisa didhewekaken dadi puisi pilihan.
   Ring buku antologine seliyane 200 karya iku ditambah 28 karya undangan teka penyair lan panitiya, kelebu D. Zamawi Imron sesepuh penyair teka Medura, Doktor ilmu komputer teka Universitas Indonesia Riri Satria, Achmad Taufiq hang tau ulih penghargaan puisi teka Malaysia, Ketua Panitiya Iqbal Baraas, Ketua DKB Hasan Basri lan liyane.
   Ring pungkase seminar, para penyair macakaken Maklumat Lembah Ijen lan nandhatangani sepandhuk maklumate hang unine gedigi:
  Kami para sastrawan Asia Tenggara menyatakan bahwa: sastra adalah milik segala bangsa.
Sastra sebagai buah kreativitas manusia yang tidak dapat dilepaskan dari kehidupan harus terus dipelihara dan dimajukan dari generasi ke generasi.
Oleh karena itu pengarusutamaan sastra dalam pendidikan harus diwujudkan sebagai denyut kebudayaan yang berkesinambungan.
Banyuwangi, Pantai Boom 26 Oktober 2024.
   Muga-muga Pemda lan DKB kelaksan nggawe JSAT saben rong taun sepisan.
   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.