Janger Kesenian Teradhisional hang Jemeger (Bagiyan 1 teka 4)

Antariksawan Jusuf (dipublikasikan pada Rabu, 02 Oktober 2024 09:24 WIB)
- Opini

Janger Kesenian Teradhisional hang Jemeger (Bagiyan 1 teka 4)

Ditulis ring Hasan Sentot

Kesenian Derama Teradhisonal Janger Banyuwangi, bisa bain diarani Derama Teradhisional hang magih madeg jejeg ring tengah-tengah terjangan hiburan modheren. Naming kadhung dirunut teka mula kawite kesenian mau, kaya adoh ambi pakem hang ana. Nah, kadhung ndeleng 'perkembangan' Janger mengarep ya rada perihatin. Arep obah lan polah kelendi bain nana hang ngilingaken, aju sepira 'toleransi' nang uwah-uwahan lan pengaruh anyaran mau? Kahanan iki kadhung disanggakaken nang seniman lan hang duwe Janger, mesthi abot. Bisa-bisa hing payu Janger lan magicjar bisa sing ana seterume, aliyas sing bisa mangan. Masarakat umum terima ndeleng, paran hang ana (geratis pisan) ya wis ditonton.
   Nah, masalahe aju kelendi jare lare-lare enom saiki? Janger iku mula gedigutah? Aju nang endi 'peran" pemerintah daerah? Endane kesenian dhaerah hang duwe pakem lan duwe 'nilai-nilai' luhur digeningakaken 'nggolet pangan dhewek', ambi cara nguwah-nguwah kesenian mau?
   Kesenian Janger Banyuwangi (ana hang ngarani Damarulan, Jinggoan) saiki kelebu Kesenian Daerah ring Banyuwangi hang kerep ulih tanggapan wong duwe gawe. Malah kerep uga nerima tanggapan teka njabane Banyuwangi, mulai Jember, Situbondo, Bondowoso, Lumajang, Malang lan malah ana hang sampek teka Jawa Tengah.
   Kadhung usum wong ewuh kaya ulan-ulan Mulud, Bakda Mulud lan Sapar, bisa dipesthekaken mesthi ana tontonan Janger ring Banyuwangi. Malah kerep sewengi lebih teka telung panggonan, siji ring Gladag (Janger Banje), Kepundungan (Janger TS Jajag) lan ring Tembakon (Janger Bongkoran - Parijatah Wetan). Teka 3 Janger hang manggung bengi iku, mung bisa kelakon nonton 2 Janger ring Gladag - Rogojampi lan Kepundungan - Srono.
   Janger Banje kelebu  tuwek, merga madek sakat tanggal 20 Agustus 1942. Malah janger hang magih digarap Man Sudiyo iku, tahu nyacak nganggo 'antawacana" (dialog) Basa Using, keterangan teka Kang Samsul Hadi, wong hang bengen dines ring PDAM Kudus Jawa Tengah (saiki wis sampek umur-red). Janger Banje uga wis tahu rekaman kaset sakat tahun 1970-an, mula ana lakon Babat Alas Bayu. Rakyat ring kana digambaraken wong Using lan ngomonge ya nganggo Basa Using. Kadhung sak enteke cerita nganggo Basa Using, isun durung tau weruh dhewek.
   Kadhung dideleng sak kelebatan, mula Janger Banje nduduhaken kelase kadhung Janger gedhe lan apik. Teka penganggone (kostum) wis apik lan nduduhaken kadhung tontonan panggung hang wis diolah ambi cara modheren. Paran maning gamelan (intrumen musik) wis beda ambi bengen. Lebih temata lan panggonan wis kajen ring genjot cilik (mini stage) ngisore genjot gedhe. Sing ngelesed nang lemah kaya Janger bengen. Ring genjot gedhe, uga diweni wates kain kanggo ngaling-ngalingi bagiyan ngingsor (sikil pelakon). Sekabehe tendha Janger wis lebih apik teka bengen,  mulai teka gambare (ornamen) lan dedege uga wis kukuh lan kusa.
    Damar sentrong (lighting) wis nuju lebih apik, merga kabeh nganggo listrik sing kaya bengen nganggo damar seterungking utawa gaspon. Kadhung kepingin werna macem-macem, ditutup deluwang hang werna-werni. Saiki wis kari milih lan kari ndeleng picise kadhung kepingin apik. Semono uga suwara (audio), wis nganggo mik siji-siji masiya gantiyan. Timbang bengen terima nganggo mik gantung, kadhung arep ngomong kudu nggoleti mik sulung aju ngadeg ngingsore. Iki mesthi ngganggo "blocking' pemain Janger mau kadhung dideleng teka teori derama pementasan.
    Ale suwara iki bisa 'dimaksimalaken" ambi nganggo wireless (klip-on) hang cilik lan angger-angger pemain diweni siji-siji. Kadhung iki mula larang, nawi sithik-sithik sulung. Munggone ana hang nggarai, biyasahe kelompok liya aju gampang miloni kanggo apike 'penampilan' Janger mau. Iki ciri has wong Banyuwangi gampang niru lan miloni perkembangan jaman.

(Ana Sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.