Java-Instituut lan Sejarah Gandrung (Bagiyan 2, pungkas)

Antariksawan Jusuf (dipublikasikan pada Rabu, 28 Agustus 2024 12:22 WIB)
- Opini

Java-Instituut lan Sejarah Gandrung (Bagiyan 2, pungkas)

Sair gendhing "Padha Nonton" umpamane dianggep gendhing kang dikarepaken bisa ngobong semangat para lare enom kanggo ngelawan penjajah.

Padha Nonton

Padha nonton

Pudhak sempal ring lelurung

Ya pendhite pudhak sempal

Lambeyane para putra

Para putra

Kejala ring kedhung liwung

Ya jalane jala sutra

Tampane tampang kencana

Kembang menur

Melik-melik ring bebentur

Sunsiram-siram alum

Sunpethik mencirat ati

Lare angon

Gumuk iku paculana

Tandurana kacang lanjaran

Sak unting kanggo perawan

Kembang gadhung

Sak gulung ditawa sewu

Nora murah nora larang

Kang nawa wong adol kembang

Wong adol kembang

Sunbarisena ring Temenggungan

Suniring payung agung

Lambeyane membat mayun

Kembang abang

Selebrang tiba ring kasur

Mbah Teji balenana

Sunenteni ring paseban

Ring paseban

Dhung Ki Demang mangan nginum

Seleregan wong ngunus keris

Gendam gendhis kurang abyur

Penguwasa, hang diarani Ki Demang, hang wis digawe mendem ring paseban, mendem keenaken lan mendem kelakuwan sakwenang-wenang, gedigu jare ruwahe Hasan Ali,  bengen ketua Dewan Kesenian Blambangan. 

Tuladha liyane, sair gendhing perjuwangan liyane:

 Seblang Lukinta

Wis wayahe bang-bang wetan

Kakang-kakang ngelilira

Wis wayahe sawung kukuruyuk

Lawang gedhe wonten hang njagi

Medala lawang butulan

Wis biyasahe momong adhine

Sak tinjak baliya mulih

Jare Pak Hasan: sair ini cetha kewela-wela ngengetaken ring perlawanan lan taktik gerilya.

Sair iki bisa diwedhar gedigi:

Lawang gedhe ana hang njaga

Liwata lawang mburi

Wis biyasahe momong adhine

Sak jangkah aju mundur

Scholte, hang dadi Direktur Normalschool ring Blitar uga njelentrehaken: "Para gandrung mau njuged miloni irama hang rada cepet hang diunekaken teka alat musik ketuk mauka, lan njuged bareng pemajune. Saben pemaju ulih maju kelawan ngelungaken picis sulung ring piring wera lan iku uga ngupahi iyane bisa milih gendhing hang dadi kekarepane.”

   Scholte nyathet lebih 97 gendhing-gendhing gandrung. 

   Kelendi uneke Scholte nerangaken bab gandrung, nggarai awak dhewek hang diwarisi kesenian iki kudu mituhu nguri-uri.

   "Para gandrung iki anak wadone wong Using, sewijine suku hang kudu dianggep sisane wong Belambangan...aran Using iku digawe celukan nyang wong Belambangan ambi wong tekan...Aran hang paling pas setemene Wong Belambangan.”

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.