Jepang Nggoleti Inggrisan (Bagiyan 1 teka 2)

Antariksawan Jusuf (dipublikasikan pada Selasa, 24 September 2024 08:26 WIB)
- Opini

Jepang Nggoleti Inggrisan
Ditulis ring Hasnan Singodimayan

Kabeh kahanan ring kutha iku dadi uwah, nalika pendhudhukan Jepang. Kutha Banyuwangi dibom Jepang nganggo kapal udara. Hang keneng, Gadhen ning Kampung Ujung lan Sawahan.
   Wong kutha padha ngalih nyang njabane kutha. Ana hang nang Cacalan, Sukowidi, ana hang nyang Payaman Giri, ana hang nyang Gunungsari, Tembakon, Gontoran. Ana uga hang nyang Pakis lan Sobo. Hang ana ning kutha, kari uwong Cina lan uwong Arab, wedi ninggalaken dagangane.
   Embuh teka endi tekane, Tentara Jepang hang diarani Bala Tentara Dai Nippon iku melebu nyang kutha, nunggang macem-macem kendharaan. Mulai sepidhah pancat, sepidhah udhug, montor tepak lan prahoto. Embuh sapa hang muruki, ambi ngucap: “Banzai, banzai. Dai Nippon, Dai Nippon.” Tentara Jepang hang ning ndhuwure kendharaan, mbales ucapane uwong-uwong iku, ambi ngucap jawaban: “Indonesia, Hinomaru.[1]”
  Salah sijine kendharaan tentara Jepang iku, hang isine uwong lima, mandheg ring ngarepe Masjid, pas nyang lawang kori. Uwong telu mudhun, mbukak sepatu lan sembayang rong rekaat, cepet-cepetan. Embuh paran karepe sampek saiki sing ana uwong hang ngarti. Propagandha utawa temenanan? Mung Pengeran hang ngarti njaba lan njero batine menungsa.
Jepang ngilangaken pertandha parek lan adohe lakon. Pal-pal hang digawe Landa, ditatahi angkane kilometer. Banyuwangi-Rogojampi ambi Banyuwangi-Galekan, mung pal Banyuwangi Nol hang ning Klembon lan Banyuwangi Nol hang ning Perliman sing sampek dirusak. Merga ceritane Pal Nol ning Klembon lan ning Perliman durung ana ahli sejarah hang nulis perkara iku.
   Telung tahun bareng ambi Jepang, kutha Banyuwangi uwah temenan. Ngarepe Kantor Polisi, manggon ning tegal. Tentara Jepang nggawe MIARI, menara Jepang hang dhuwure emeh padha ambi menara Masjid Gedhi hang katon buntek. Digawe teka jajang, disambung-sambung. Arane MI iku artine menara lan ARI artine jajang. Padha ambi arane TAKE (TAKI) ARI. Taki iku landhep lan Ari iku jajang. Dadi jajang landhep, umume diarani Bambu runcing. Hang pungkasane balik dienggo rakyat Indonesia, ngelawan Jepang.
   Telung taun Sekolah Rakyat nalika jaman Jepang, pelajarane mung telu, yaiku TAISO, KINROHOSI lan pelajaran Cara Jepang. Pelajaran liyane paran jare gurune, asal pelajaran telu mau aja ditinggal. Durung ana SMP lan SMA, kabeh mung Sekolah Dasar.
   Taiso iku olahraga, ditambah pelajaran perang-perangan, nganggo Takiari. Kinrohosi pelajaran Kerja bakti, bantu desa-desa, kebersihan lan kewaspadhaan. Unen-unene mung sithik “Awas mata-mata musuh tutup mulut” ana gambare mata lan cangkem.

1] Hinomaru, arti sak benere bunderan serngenge, simbol hang dienggo ring bendera Jepang

(Ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.