Jepang Nggoleti Inggrisan (Bagiyan 2 pungkas)

Antariksawan Jusuf (dipublikasikan pada Rabu, 25 September 2024 08:17 WIB)
- Opini

Jepang Nggoleti Inggrisan (Bagiyan 2 pungkas)

   Pelajaran basa Jepang seru enake. Ning njerone kelas ditulisi utawa ditempeli huruf Katakana. Saben dina ngomong cara Jepang. Mung setahun, kabeh lare sekolah uwis bisa ngomong cara Jepang. Huruf Hiragana[2] ambi huruf Kanji[3], dijanjekaken kadhung uwis melebu sekolah Pelayaran ning Probolinggo lan ning Suroboyo.
   Anane sekolah, nalika jaman Landa sampek jaman Jepang, akehe bisa diitung, yaiku Sekolah Rakyat (SR) Lateng, SR Penganjuran, SR Tukangkayu, SR Sobo ditambah Madrasah Al Khairiyah lan Madrasah Ibtidaiyah Al Irsyad, ambi HIS[4] lan PHIS[5]. HIS lan PHIS nalika pendudukan Dai Nippon, dadi Sekolah Mardi Putri. PHIS dadi Sekolah Guru Bantu.
   Nalika jaman Proklamasi, Sekolah Mardi Putri dipecah dadi loro, separone dienggo Markas Angkatan Laut 0032. Saiki dadi SD Kepatihan (hang bengen tau duwe aran SD Tegalloji) lan PHIS. Embrio SMP Kelampok. Sekolah Guru Bantu, ngalih nyang ngarepe, manggon pareke Markas Polisi. 

Nalika jaman Jepang, kutha Banyuwangi katon meromong kaya kobong, rasane kaya milu Perang Asia Timur Raya. Uwong-uwong didadekaken Kaibodan[6]. Lare enom-enoman didadekaken Seinendan[7]. Lare-lare hang magih sekolah dasar, didadekaken Seinen Gakko[8].
   Uwong-uwong wadon dadi Fujinkai[9]. Ning kampung, ana Tonari Gami[10], gotong royong sak lingkungan.
   Kepala Kelurahan diarani Kuco[11]. Camat diarani Sonco[12]. Bupati diarani Kenco[13]. Nyang antarane wilayah, kudu nggawa surat keterangan jalan. Nang Kabat, nang Glagah lan nang Giri.
   Hang paling repot Sonco Giri, merga wilayahe sampek Wongsorejo. Warga hang arep nyang kutha, kudu liwat Kalipuro nyang Penataban, mung golet keterangan jalan ning kantor Sonco, buru bisa melebu kutha liwat Penataban. Ning perbatasan Sonco, dijaga Kaibudan.
    Warga sipil sing ulih nyang Boom. Hang njaga ning Sasak Boom Meneng[14] dudu Kaibodan utawa Seinendan, merga dijaga ambi tentara Jepang dhewek. Hang wani ngelanggar, ditangkep lan dipepe kaya kembang Pepe ning perapatan pasar, mung dianggoni seluwar cekak.
   Menyang nunggang sepur, sing ulih nggawa beras lebih teka rong kilo. Kadhung using, ditangkep Kenpetai, yaiku polisi Jepang. Hang aran Kenpetai iku, polisi Jepang hang padha ambi Gestapo ning Negara Jerman[15]. Markase ning Sokiti Biskalan hang diarani pendhudhuk Kamar Bola (saiki diarani Gedung Juang). Jaman Republik dadi Markas Hizbullah. Merga hang wani nyerbu Markas Kenpetai iku Tentara Hizbullah. (HS)

2] Hiragana, aksara Jepang hang dienggo nulis ukara-ukara hang sara kadhung ditulis nganggo aksara Kanji

[3] Kanji, aksara Jepang hang dienggo ngelambangaken konsep utawa ide, utamane ukara Jepang utawa basa Tionghoa

[4] Hollandsch-Inlandsche School (Sekolah Walanda kanggo Bumiputra)

[5] Partikelir Hollandsch-Inlandsche School (Sekolah Swasta Walanda kanggo Bumiputra)

[6] Kumpulan hang dianakaken ambi Jepang, tugase bantu tugas-tugase pulisi lan jaga desa.

[7] Kumpulan hang dianakaken ambi Jepang, kanggone lare-lare umur 15-25 hang dilatih kegiyatan semi militer nana senjatane, makene bisa bela negara, taping setemene lare-lare iki dienggo pasukan cadhangan

[8] Padha ambi Seinendan, tapi anggotane teka lare-lare hang magih sekolah

[9] Kumpulan husus kanggo wong wadon jaman Jepang

[10] Kumpulan kanggone lingkungan

[11] Ku = desa

[12] Son = kecamatan

[13] Ken = kabupaten

[14] Boom Meneng, aran pelabuhan hang ana ning jero dharatan Banyuwangi. Boom Ombak, aran pelabuhan hang ana ring Selat Bali (saiki uwis sing ana).

[15] Gestapo Nazi (Polisi Rahasia hang nduweni kuwasa hang gedhi ring jaman Hitler)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.