Juwara Literasi Using 2024 Milu Festival Tunas Bahasa Ibu

Antariksawan Jusuf (dipublikasikan pada Senin, 04 November 2024 06:12 WIB)
- Laporan

Banyuwangi wis milih lare-lare juwara ring wolung acara lomba ring Festival Literasi Using. Hang juwara pitung acara Lomba yaiku Ndongeng, Ngewer, Puisi, Cerita Cendhek, Pidhato, Aksara, lan Nembang arep diejak nang Festival Tunas Bahasa Ibu (FTBI) tingkat propinsi ring Surabaya tanggal 6-7 Nopember kesuk.
   Taun iki Literasi Using nduweni tema "Upaya nguri-uri lestarine basa dhaerah Banyuwangi".
   Peserta Lomba Literasi Using taun iki ana 500 lare hang dibagi ring wolung materi Lomba. Munggah seru timbang taun sedurunge hang mung kira-kira 300 lare, jare Ketua Kelompok Kerja Guru Basa Using SD Prastono Santoso hang dadi koordinator lapangan ring iwuh iku.
    Setemene Pemda Banyuwangi wis nganakaken Festival Literasi Using iki sakat 2021 kelawan materi Lomba yaiku Puisi lan Ndongeng. Taun 2022 Ndongeng lan Memengan Sandiwara. Taun 2023 ana Memengan Sandiwara, Dongeng lan Pidato.
   Aju ketepakan, ring taun 2023 iku Badan Bahasa liwat Balai Bahasa Jawa Timur nganakaken Revitalisasi Bahasa Dhaerah hang ring Jawa Timur kelebu basa Medura lan Using. Revitalisasine mulangaken pitung ketrampilan basa yaiku 1. Ndongeng 2. Baca Tulis 3. Pidhato 4. Ngewer 5. Nembang 6. Nggawe Puisi 7. Nggawe Cerita Cendhek.
  Aju lare-lare hang juwara ring pitung acara iku digawa ring Festival Tunas Bahasa Ibu (FTBI) ring Tingkat Propinsi, lan hang menang digawa ring tingkat nasional. Peserta teka Medura disaring teka petang kabupaten yaiku Sumenep, Pamekasan, Sampang lan Bangkalan. Taun iki malah ditambah Situbondo lan Bondowoso. Dene peserta teka Banyuwangi hing kathik ana saringan ring propinsi, langsung milu nang FTBI tingkat nasional, jare Prastono.
    "Tanggal 6-7 Nopember iki para pemenang pitung acara Lomba mau arep diejak nyang Surabaya kanggo FTBI tingkat propinsi," jare Prastono.
   Lare SD ana pitung lare, SMP pitung lare, lan saben lare dikancani siji guru pembina. Dadi kabehe ana 28 hang arep berangkat nang Surabaya. Tambah maning tim seni tari jak enem lan tim angklung Larasati jak wolu.
   Pitung Maestro Revitalisasi Basa Using, kabeh didadekaken juri. Slamet Penyet (Dongen), Ali Kenthus (Ngewer), Nanang (Nembang), Nani Asiany (Pidhato), Abdullah Fauzi (Puisi), Antariksawan (Baca Tulis), Nur Holipah (Cerita Pendek). Panitiya wis diwanti-wanti ambi Ketua Panitia Pelaksana Revitalisasi BBJT Ibu Okta Vidiyanti supaya ngejak pitung maestro iki minangka juri. Polae hang taun sore, merga Maestro hing diejak aju tampilan Ngewere hing selaras ambi hang diajaraken ring maestrone.
  
Juwara Ndongeng:
1. Banyuwangi Kota
2. Kabat
3. Blimbingsari
4. Cluring
5. Singojuruh

Juwara Puisi:
1. Kalipuro
2. Banyuwangi Kota
3. Kabat
4. Bangorejo
5. Kalibaru

Juwara Pidhato:
1. Banyuwangi Kota
2. Kabat
3. Blimbingsari
4. Sempu
5. Tegalsari

Juwara Aksara:
1. Blimbingsari
2. Glagah
3. Rogojampi
4. Bangorejo
5. Kalibaru

Juwara Nembang:
1 Rogojampi
2 Glagah
3 Tegalsari
4. Gambiran
5. Banyuwangi Kota

Juwara Cerita Pendek:
1. Kabat
2. Giri
3. Glagah
4. Banyuwangi Kota
5.Rogojampi

Juwara Ngewer:
1. Kec. Rogojampi
2. Kec. Srono
3. Kec. Cluring
4. Kec. Glagah
5. Kec. Banyuwangi Kota

Juwara Juara Memengan Sandiwara:
1. Kec. Srono
2. Kec. Kabat
3. Kec. Banyuwangi
4. Kec. Sempu
5. Kec. Cluring

Dene Iringan musik terbaik keneng Sempu.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.