Kang Hasan Ali Sentot Mulih saklawase

Samsul Hadi (dipublikasikan pada Senin, 05 Juli 2021 09:29 WIB)
- Obituari

Kemesut rasane atinisun rungu kabar kadhung Kang Hasan tinggal donya. Belegere Kang Hasan hang gedhi dhuwur kaya wong kang sing duwe kesel golet upa kanggo anak lan rabine dibelani njajah desa milangkori. Isun kenal kang Hasan sakat ana Group FB Gesah Cara Using Banyuwangenan Aselai hang diedegaken Dik Nanang Yuswantoro Yuniar, isun kecaruk Kang Hasan Kawitan tahun 2008 nang Surabaya ring Bandara Juanda, isun arep nyang Banjarmasin, Kang Hasan arep nyang Semarang. Marek digu kecaruk maning nang Bakungan ring umahe pelukis Kang S. Yadi tepak ana Kumpulan Isun Kang Hasan, Kang Bambang Sutejo Malang, dhik Nanang Yuswantoro  lan Man Sumono Abdul Hamid. Ring pertemuan iku ana Bik Temuk Gandrung, anang Hasnan Singodimayan, Kang S.Yadi lan Surti Handayani. Kumpulan iku mbahas budaya lan kesenian Banyuwangi kelendi carane bisa tambah moncer. Iling kala iku jak telon Isun, Kang Hasan lan Kang Bambang Sutejo jejer bareng mangan pecel Pitik ambi muyab gemuyu-gemuyu polae isun mangane paling akeh. Marek kumpulan iku mulih bareng jak papat Isun, Kang Hasan, Dhik Nanang lan Kang Lukwiyanto nyambang Anang Basir Noerdian lan anang Andang CY, para maestro gendhing-gendhing Banyuwangi.

   Hang paling ngangeni iku tepak ngetutaken Kang KH Ali Imron ceramah nang Bedewang. Marek ceramah, Sohibul Bait ngongkon mangan nang kabeh kancane KH Ali Imron, nang kana disuguhi iwak laut bakar lan liya-liyane tapi ana hang istimewa kanggonisun lan Kang Hasan, nang kono disuguhi pisan pelasan uling, mung ana enem pelasan. Isun lan kang Hasan rebutan  ya Allah... kadhung enget iku isun kudu nangis merga sak iki Kang Hasan wis anteng dipeluk bumi. Pungkasan isun kecaruk Kang Hasan nang Surabaya lan semayanan nang Umahe Kapten CPM  KH. Ali Imron hang teka Macan Putih. Sepisan silahturahim kepindho kang Hasan arep ngundang Kang KH Ali Imron kanggo ceramah pengajian nang Parijatah nang umahe kakange Kang Hasan. tapi sing kelaksan merga pas jadwale pengajian iku sakdurunge Kang KH Ali Imron wis nyulungi mulih sak lawase.

      Kang Hasan sak iki Rika wis anteng dipeluk bumi, muga sekabehe amal ibadahrika diterima lan sekabehe salah lan luputrika disepura Allah SWT lan muga Rika dipanggokaken nang suwargane Allah.. merga isun nyakseni Rika iku wong hang apik, wong hang soleh. Amin.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.