Kejayan Roh Macan Putih (Bagiyan 2 pungkas)

Antariksawan Jusuf (dipublikasikan pada Jumat, 27 September 2024 07:29 WIB)
- Opini

Kejayan Roh Macan Putih (Bagiyan 2, pungkas)

   Miturut cerita rakyat teka Punggawa hang kuwasa, ning jaman Raja Tawang Alun pindhah nyang Macan Putih lan pengalaman ngadhepi dulur-dulure hang serakah, pemerintahan diatur nduwe Punggawa hang ngurusi ukara lan perkara. Jaman sak iki bisa diarani Menteri.
   Hang ngurusi perkara sak jerone negara, diarani Singa Negara. Hang ngurusi perkara njaban diarani Singa Maya. Hang ngurusi lare enom-noman, diarani Singa Teruna. Hang ngurusi perkara perang, diarani Singa Dilaga. Hang ngurusi asil pangan diarani Singa Lateri. Aju hang aran Pendheta, Penasihat Raja sak jerone Keraton, diarani Singa Jeruh.
   Merga Kerajaan Macan Putih nalika iku padha kuwasane ambi Mataram lan rebutan pengaruh, aran-aran iku diutak-atik miturut sastra Jawa Kuna. Aran-aran iku dadi gedigi: Sing A Negara, sing ana negara. (Ed: aksara A ngadeg dhewek, ring basa Sansekerta nduweni arti using). Sing A maya, sing duwe kuwasa. Sing A Teruna, sing duwe kadher. Sing A Dilaga, sing duwe tentara hang bisa perang. Ana maning hang ngarani aran-aran iku, aran perbekel jaman Tirtaganda durung dadi Banyuwangi.
   Setemene mula bener, Banyuwangi iku sugih cerita rakyat. Anane kutha Banyuwangi bain, ana loro. Sri Tanjung Sidapeksa lan Banterang Surati. Hang aran cerita rakyat iku, para akademisi wis padha nguri-uri nggoleti Kearifan Lokal, kudu diceritakaken hang sakbenere. Aja kaya Janotok “Sing weruh ngaku weruh. Weruh sithik ceritane akeh.”
   Cerita Minak Jingga, ana hang nganggep dongeng, ana hang nganggep sejarah, ana hang nengahi sejarah hang didongengaken, taping dudu dongeng hang dadi sejarah.
   Kaya umpamane cerita Syeh Maulana Ishak, Ibrahim Asmara, Syeh Wali Lanang. Obyeke siji, subyeke akehe telu. Durung maning sejarah Inggrisan. Hang magih ana hubungane ambi Conventie London, 13 Agustus 1814, hang diarani Traktat Singapura, yaiku tukar guling antarane Belambangan ambi Singapura.[2] 
   Nalika iku, wong-wong Inggris hang ning Belambangan, mencak-mencak merga usaha perkebunan wis gadug Glenmore, Glenford, Glen Falloch, ditukar guling ambi pulo cilik hang tanah karang ning pucuke Malaka. Merga Malaka wis dadi jajahan Inggris. Jawa wis dadi jajahane Landa. Mangkane saiki diarani tanah Belangket.
   Cagar budaya Inggrisan, magih katon wujud, magih akeh ceritane. Cerita sejarah utawa cerita rakyat. Hang aran terowongan sampek muara Kali Elo, durung ana buktine hang jelas. Durung ana hang wani ngambah.
   Kantor Pos, Telepon lan Telegraf  hang dibangun Inggris, kanggo hubungan nang Australia, jajahan Inggris hang anyar durung tahu ana ceritane lan hang nulis. Insya Allah arsip lan dokumen magih ana. Aja mung ngomong perkara hang wis tuntas lan mari, dadine Banyuwangi. 

Hasnan Singodimayan



[2] Sumber liyane nyebut Perjanjian Landa-Inggris 17 Maret 1824, nyebutaken Bengkulu dioper ambi Singapura

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.