Kepala BBJT: Aja Mandheg Ulihe Nulis
Antariksawan Jusuf (dipublikasikan pada Rabu, 27 November 2024 06:34 WIB)
- Laporan
Balai Bahasa Jawa Timur (BBJT) ngewekasi lalare hang milu Kemah Cerpen ring ulan Nopember iki gena hing mandheg ulihe nulis.
Saiki wis ana 45 lare alumni Kemah Cerpen, 20 lare teka ulan Oktober lan saiki 25. "Diarepaken lalare alumni ini bisa nulis sak judhul saben ulane," jare Kepala BBJT Dr. Umi Kulsum, MHum tepak nutup Kemah Cerpen hang dianakaken tanggal 22-26 Nopember ring Hotel Platinum Tunjungan, Surabaya.
Bu Umi semaya karyane lalare iki bisa diterbitaken kelawan kerjasama ambi penerbit lan medhiya, engkone bisa dienggo Dinas ring pembelajaran muatan lokal.
Sak suwine limang dina, lalare iku dikongkon nulis cerita cendhek nganggo basa dhaerah lan dialihbasa nang bahasa Indonesia, dikurasi lan asile arep diterbitaken ring BBJT.
"Lare-lare hang milu iwuh iki minangka pupus perujukan hang njaga basa ibu," jare Bu Umi. Merga ring tengah-tengahe gempuran globlasisasi hang saya seru nyerene, ndadekaken lare-lare hing mongkog maning nganggo basa dhaerahe.
BBJT ya nerbitaken majalah basa Medura Joko Tole lan basa Using Lontar Using hang bisa dadi medhia kanggo nampung karyane lare-lare iki, jare Bu Umi.
Seliyane majalah, BBJT uga nerbitaken buku cerita dwi bahasa. Taun ngarep lalare iki lan guru pendhampinge nawi bisa milu nulis buku cerita anak kanggo TK lan SD.
Liwat KKLP Penerjemahan, Balai Bahasa arep nerbitaken 113 buku cerita kanggo lare-lare dwi basa. Yaiku basa Indonesia lan alih basa nang Jawa, Medura lan Using.
Salah siji bukune ditulis ambi lare hang magih kelas 5 SD, jare Bu Umi, hang uga njaluk supaya diselabaraken pentinge nguri-uri basa dhaerah, kearipan lokal, budaya lan cerita.
Sak ulan iki bain BBJT nduwe iwuh Festival Tunas Bahasa Ibu, Festival Teater Berbahasa Jawa, lan nggelar Kemah Cerpen ping pindho, sepisan ulan Oktober lan sepisan ulan November.
Iwuh kabeh iki minangka agenda hang lebih gedhi yaiku Revitalisasi Bahasa Daerah (RBD). Ring Jawa Timur, RBD wis digelar sakat 2023, hang disasar yaiku basa Medura lan basa Using.
Kemah Cerpen hang kaping pindho iki dipiloni 25 lare SD lan SMP, 18 teka Medura lan 7 teka Banyuwangi.
Mafrida Aulia Zahra (SMPN 5 Banyuwangi), Elvira Adelia Zahra (SMPN 2 Srono), Ferlin Anisah Turrohmah (SMPN 1 Singojuruh), Rahma Sekar Ayuningdyaz (SMPN 4 Banyuwangi), Qonita Ruby Humayra (SDN 1 Kabat), Marisa Safa Azahra (SDN 1 Jambesari), Jesika Maulidyah (SDN 3 Tamansuruh).
Ring penutupan Kemah Cerpen sore iku, rombongan teka Banyuwangi kelebu narasumber Nur Holipah lan para guru pendhampinge - Prastono Santoso, Heni Kurniawati, Sri Rahayuningsih, Azizah, Irawati, Cecilia Pramudita Kusumaningrum- nampilaken gendhing Umbul-Umbul Belambangan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
