Kerawu Pakis Kabar Wong Mati (In Memoriam Ivant Ardian)

Antariksawan Jusuf (dipublikasikan pada Senin, 16 Januari 2023 07:18 WIB)
- Obituari

Telung dina sedurunge Ardian Fanani, wartawan detik.com hang kerep diceluk Ivan sampek umur dina Sabtu sore (14/1) kaya wis kerasa iyane ngejak gesah Haidi Bing, pemimpin grup kesenian Uni Using hang uga pengendang asli Kemiren. Edi, gedigu celukane Haidi iki, nulisaken gesahe ambi ruwahe.

AF: "Di.....kari kangen sayur pakis masakane emak ya Di...."
HB: "Iya Mas, ayuk kapan meriniya?
AF: "Iya Di, kapan-kapan ya merana ambi Desi lan Alif."
HB: "Iya Mas, kabarana kapan ape ning Kemiren."
AF: "Iya Di...kelawasen sing tau mangan masakane emakisun."
HB: "Iya Mas, Sun anteni."
AF: "Oke, kesuwun yah..."
HB: "Padha-padha Mas."
   Gedigu unine gesahe Ivant hang pungkasan nyang Edi. Biyasahe kadhung marek gedigu, Ivant hang dhemen jangan pakis, diolahaken engkisuke ring emake Edi.
  Naming penjalukan jangan pakis iku kaya pertandha gok iyane setemene arep pamitan. Ya hing ana hang nyangka merga iyane magih enom, umur 41.
   Ring adate wong Kemiren, jangan pakis ithuk-ithukan iku biyasahe diedum nang lare-lare cilik kadhung ana wong hang nemoni pesthine, saben isuk, saben dina.
   Dadi mula hing maido kadhung ana wong ngomongaken Kerawu Pakis (jangan pakis) dihubungaken ambi wong mati.
   Umpamane kerep ana unen-unen: "Dadi uwong aja sombong, kadhung wis ana kerawu pakis kapok Sira..." cumpu wekas iki kayane hang arep diwarah ring ruwahe nang Edi. 
   Saben kampah nong umahe Edi, ruwahe mesthi madhang paran bain olahane emake Edi. Saben teka mesthi ngewani rejeki nyang emake Edi hang wis dianggep emake dhewek.
   Ring matane Edi, Ivan hang uga aktip ring kegiyatan alumni Jebeng Tulik iki uwonge awehan lan gampang nulung wong liya lan geromyoh. Saben lebaran Idul Fitri mesthi ngelungaken jakat pitrahe nong wong-wong Kemiren. Gedigu welase ruwahe nang Kemiren. Iyane ya mesthi milu ring acara-acara gedhe ring Kemiren lan merga ana iyane sithik akeh acara ring Kemiren dadi lan apike.
   Kira-kira sepuluh taun kepungkur, ruwahe nggawe akuarium kanggo iwak arwanane lan hiasane teka kayu sanakeling diukir kelawan aran: Kemiren. Merga kaju, Edi takon nyang ruwahe, "Apuwa Kemiren?" Jawabe: "Iya, merga Isun iki wong Kemiren hang manggon ring kutha."
Jare Edi, ruwahe mula wong apik. "Muga-muga dipadhangaken dalane, kening banyune lan dijembaraken kubure."

Innalillahi wa inna ilaihi rojiun.

  

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.