Konco Hoo Tong Bio (Bagiyan 1 teka 2)

Antariksawan Jusuf (dipublikasikan pada Selasa, 06 Februari 2024 07:47 WIB)
- Esai



Konco HOO TONG BIO (Bagiyan 1 teka 2)

Teka Geger Pacina, Sampek Temebluke Balambangan 

Ditulis ring M. Hidayat Aji Ramawidi

 

Ana panggonan ibadah wong-wong China ring Kutha Banyuwangi hang aran Kelenteng/Konco Hoo Tong Bio. Konco iki nyimpen sejarah hang dawa teka Geger Pacina ring Batavia taun 1740,  sampek temebluke Kerajaan Balambangan taun 1767/1768.

Ring ulan Pebruari 1740, ana kedadeyan hang diarani Geger Pacina ring Batavia. Kala semana VOC-Walanda numpes kelor 10.000 uwong keturunan China hang ahire ndadekaken akeh wong-wong China iku mau semembur minggat teka Batavia.

Kawitane Sunan pakubuwana II ndhukung iyane, naming mari digu mbalik ndhukung VOC-Walanda.

Sunan Kuning Vs Pakubuwana II

Perkara iki nggawe pengikute Pakubuwana II padha getun uga mbalela lan bareng-bareng mbela nyang wong-wong China. Mari digu ndadekaken Raden Mas Garendi/Sunan Kuning dadi pimpinane. Ambi dikon agage ngelakoni mbalela nyang Sunan Pakubuwana II.

30 Juni 1742, Sunan Pakubuwana II ambi Baron von Hohendorff melayu lan sengidan nyang Pondok Pesantren Gebang Tinatar ring Tegalsari (Ponorogo) njaluk tulung nyang Kyai Ageng Kasan Besari.

Mari digu, tanggal 1 Juli 1742, Sunan Kuning dadi raja ring Kartasura ulih gelar Sunan Mangkurat V.

Tandangane Keturunan Surapati

Semono uga para pejuwang China ambi pejuwang Jawa ring Jawa Wetan. Iyane milu ambi Pasukan Surapati hang magih ana uga ring wektu iku wis dipimpin ambi anake lanang yaiku Bupati Malang hang aran Mas Brahim/Raden Suradilaga (1708-1742).

Juni 1743, Kapiten Sepanjang (Pimpinane pasukan China) ngusulaken makene pasukan Sunan Kuning hang wis kedhesek uga milu iyane nyang Pasuruan kanggo njuwut wong-wong Tionghoa Jawa Wetan milu melebu ring laskare. Tepak iku, Raden Mas Said/Samber Nyawa hang kawitane ndhukung pasukan China milih berjuwang dhewek ring dhaerah Sukowati, sing gelem milu nyang Jawa Wetan.

Tepak tanggal 2 Desember 1743, Sunan Kuning nyerah ambi Residen de Klerk ring Surabaya, mari digu iyane hang tau dadi ratu Kartasura mung 6 ulan suwine mauka dibuwang nyang Srilanka.

Perjanjian Ponorogo 1743

Sak mareke bisa dadi ratu Kartasura maning kelawan ditulungi VOC-Walanda, Sunan Pakubuwana II nguwekaken dhaerahe nyang VOC-Walanda hang ana ring pesisir lor Jawa, Pulo Madura, lan dhaerah-dhaerah ring Jawa Timur, ditambah dhaerah hang ring wetane garis bujur Pasuruan ambi Malang.

Anehe ring perjanjian iku, Balambangan melebu salah siji dhaerah hang dikatutaken nganggo cara karepe dhewek. Ale waktu iku, Balambangan magih dadi Negara hang merdheka tapi sing dirembugaken sulung ambi pemerintah uga rakyat Balambangan.

Sakat iku, VOC-Walanda ngerasa nduweni Balambangan hang dhasare teka perjanjian Ponorogo mauka. Pungkasane, tepak ring taun 1766 EIC-Inggris ngedekaken kantor cabang ring Balambangan uga nggawe pihak VOC-Walanda hing terima.

(Ana sambungane ring bahiyan 2)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor