Konco Hoo Tong Bio (Bagiyan 2 pungkas)

Antariksawan Jusuf (dipublikasikan pada Rabu, 07 Februari 2024 08:36 WIB)
- Esai



Konco HOO TONG BIO (Bagiyan 2 pungkas)

Teka Geger Pacina, Tekan Temebluke Balambangan

Ditulis ring M. Hidayat Aji Ramawidi

 

Kapiten Sepanjang Menyang Nong Balambangan

Mbalik ring Kapiten Sepanjang, pimpinan pasukan China iku nerusaken perjuwangane ring wetan ambi ngajuraken pos-pos VOC-Walanda antarane Pasuruan lan Pajarakan. Dhonge wis melebu wilayah Balambangan, iyane hing nemokaken anane pos VOC-Walanda hang nak diajuraken.

“Pungkasane 1743, Kapiten Sepanjang uga prajurite hang magih langsung menyang nong Balambangan pucuk wetan Pulau Jawa ambi nyerang pos-pos VOC-Walanda.

 

Dadi, antara 1744-1750an Kapiten Sepanjang iyane ana nong Balambangan, hing anane cathetan hang nyeritakaken Kapiten Sepanjang ring Balambangan nggawe perujukan prasangka kadhung iyane wis ganti aran uga dadi rakyat Balambangan. Utawa melebu ring keprajuritan Balambangan.

Umpama bener kadhung ring dhaerah-dhaerah hang tau diparani iyane kaya dene Semarang, Sidoarjo, uga Malang hang saiki ninggal aran dhaerah “Sepanjang”. Ring Banyuwangi pisan ana aran desa Sepanjang ring kecamatan Glenmore. 

Salah siji Pahlawan China hang bebarengan milu ngungsi ring Balambangan yaiku uwong hang aran Tan Hu Cin Jin. Hang mbisuke dadi hang ngawiti Konco Hoo Tong Bio ring Banyuwangi.

Tan Hu Cin Jin lan Konco Hoo Tong Bio

Ana cerita rakyat ring Banyubiru Jembrana. Kadhung Pangeran Agung Wilis ambi Prabu Danungningrat tau manggon ring Banyubiru uga mbangun kampung Muslim hang seperene magih ana. Desa Banyubiru saiki melebu kecamatan Negara kabupaten Jembrana.

Tepak mbangun perkampungan iku, salah siji uwong China yang pinter tandang gawe hang aran Tan Hu Cin Jin pungkasane dadi kancane Pangeran Agung Wilis uga milu nyang lakune.

Kadhung dideleng nong temonan sirap kayu hang angka taune 1784 hang dipercaya tandha ngadeg jejege Konco Hoo Tong Bio ring Banyuwangi, Penulis ngira kadhung tokoh Tan Hu Cin Jin (hang nurut cerita rakyat China Banyuwangi yaiku hang nggawe konco kawitan ring Banyuwangi).

Nawi kawitane ngedegaken koncone ring Kutha Lateng (1764) era I Gusti Ngurah Ketut Dewa Kabakaba. Sak mareke ibukota dielih nong Kutha Banyuwangi (jaman Mas Alit taun 1774), dadine iyane milu ngalih pisan (1784) ring kutha anyar iku. Kapan-kapan kudu ana jugeran (kajian) hang lebih jeru maning.

 

Sumber Rujukan: Babad Tanah Jawa; Geger Pacina; Babad Wilis; Babad Tawangalun; de Opkomst.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor