Lebaran Sakkuwate ring Dukuh, Glagah
Antariksawan Jusuf (dipublikasikan pada Jumat, 10 Mei 2024 06:15 WIB)
- Laporan
Lebaran Sak Kuwate ring Dukuh, Glagah
Kadhung jare ruwahe Wak Hasnan Singodimayan ring buku Enam Mata Tentang Banyuwangi, lebarane wong Using hing mung rong dina taping seminggu sampek lebaran kupat, kadhung ring Dukuh Glagah lebaran kaya sak kuwate.
"Masiya ulan Sawale entek sampek Dulkaidah hing masalah," jare sesepuh Kampung Dukuh kecamatan Glagah Kang Sanusi hang kesuwur kelawan celukan Kang Usik.
Wis marek pitung dina lebaran, wong-wong magih unjung-unjung.
"Wong liyane wis uber-uberan ambi pegaweyan, wong kene magih nutugaken lebaran. Wong tuwek ngomong, Isun durung nang Lulian, durung nyambang putu," jare Kang Usik.
Ulan Sawale wis emeh entek, taping Kang Usik durung unjung-unjung nong misan-misane, ya "(Lebarane) Aja dianggep tuntas."
Kadhung lebaran, marek lebaran dhur, mudhun salat Id, wis biyasah anak unjung-unjung nang umahe wong tuweke padha ngambung dhengkule wong tuwek. Aju wong tuwek metek endhase anake.
Ring Dukuh, tepak tamune wis rada surut, wong-wong tuwek nggawa jajane lebaran kaya jenang selo, jenang tape nekani putune. Kadhang embah buyut ambi nggawa teken lan dituntun, nemoni putune ambi ndonga, "Lik, nggaduga gedigi maning Hira ambi Isun ya Lik. Muga-muga digampangaken rejekinira, bukaken ring Gusti lawang rejekinira lan Isun, dawakena umur, Amin..." metu teka anak putune.
Ana tradhisi hang sing ditemoni ring dhaerah liya, wong-wong ring njerone lebaran wong tuwek padha barter, umpamane ana hang nggawa gula oper beras, jare Kang Usik hang ngarani umahe "Jemuah Kliwon", jerumah, bale lan pawon dadi siji. Ring ruang tamune ana meja panggonan ndeleh bubukan, gula lan morong dienggo nyorot wedang dienggo dhayohe.
Arane jajan hang entek ring toples mesthi ana hang magih dibungkus hang siyap dienggo nyiluri isine hang wis entek. "Merene lebaran 20 dina, hing asat arane jajan. Entek jajane, toplese masa dideleh lemari, ya diesogi maning."
Umume jajan hang wajib ana ring Dukuh iku jajan kelemben. Kadhang dhayoh hang teka njaba kutha milu "mberkat" mbungkus jajan kelembene. Merga kelemben iku nggawa arti "cekelen omongane wong bengen," jare Kang Usik. Ana maning jajan betonan hang jare wong Banyuwangi umume diarani bagiak.
Naming lalare, masa ngereken jajane taping nunggoni amplope. "Saiki kadhung lebaran mung nyekel telung juta, tipis iku wih... nangis Kang," jare kang Usik. Iyane ngewani lalare sak umuran SD amplop 20 ewu. Aju lare gedhine diamplopi 30-50 ewu.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
