Mitos Serngangong Ring Rawa Bayu

Samsul Hadi (dipublikasikan pada Jumat, 28 Mei 2021 07:20 WIB)
- Esai



Jaman iku sekira taun 1981, isun magih SMA kelas 1, santer anane kabar ana serngangong hang nunggu Rawa Bayu kabar iku terus dadi kembang lambe sing nang pasar, sing nang warung kopi kadhung ana hang weruh sak pasang serngangong hang manggon nang Rawa Bayu. Arane bain lare enom hang dhemen olah kanuragan kepingin nyacak-nyacak. Isun lan kanca sak peguron Iriantok Lare Tampak Bayan, Balak, Songgon  wis semayanan engko tanggal 14-15-16  nyanggong ndhedhepi serngangong nang Rawa Bayu. Tujuwane nyatakaken ulihe wong-wong padha ruwed ngomongaken serngangong. Serngangong iku uling hang seru temenan tuweke lan gedhine jare gedhine sak uwite jambe lan metu rambute. Metune wayah padhang ulan utawa tepak terang-terange ulan, mangkane isun lan Iriantok golet tanggal hang tepak kanggo mbuktekaken ana temenan tah using.

Marek isak isun lan Ir melaku nang Rawa Bayu. Uba rampe wis sun siyapaken kabeh: sentolop isi batu enem,  kopi sak termos lan sing lali ambi gedhang goreng lan keluthuk jagung sak plastik kanggo ngusir kadhung ngantuk. 

Serta gadug panggonan nggelar kelasa nang pinggir lor Rawa Bayu polahe panggonan hang tepak kanggo ndileng sak werane Rawa Bayu. Ana abane kecepak nang tengah rawa sunsentolopi  cumpu dudu uling tapi iwak dheleg hang gedhi. Dina kawitan sing ketemu hang aran serngangong iku. Dina kepindho padha bain sing nemoni paran-paran, hang ana malah suwarane manug engguk. 

Lahan tepat untuk iklan anda di sini.

Hubungi: skb@belambangan.com atau WA telp 0811843457


Ring dina pungkasan bengi iku udan gerigis, ulane sing metu. Isun keloron sing surut ulihisun kepingin weruh lan mbuktekaken kelendi sih rupane hang aran serngangong iku. Mula wujud uling hang ana rambute tah? Tah mung iwak siluman, kaya omonge wong-wong iku hang gawe isun keloron kepingin mbuktekaken.

Wis lingsir wengi, udan buru terang sunsentolopi nang tengah rawa sing ana kemeliwere blas. Cuma iwak mujair lan iwak dheleg hang katon suwarane. Manuk engguk terus-terusan muni nang kadohan lan ana suwarane celeng mberik. Nang Rawa Bayu taun iku magih alas jajang lan magih arang wong merana, kahanane magih sintru lan sunut.

Mula bengen magih tenget. Suwarane jerite celeng sansaya marek-marekaken, suwarane tambah santer lan saya parek. Suwarane kemerosake wit jajang hang diterak celeng saya anter. Sarta sunsentolopi, rombongan celeng hang mudhun teka gunung kaya marani isun sak keloron, sakkal bain isun melencat lan menek nyang wit weringin hang sun enggo ngiyup, Iriantok gelantongan nang sulure weringin. Kelasa lan panganan ludes diosak-asik celeng. Serta wis padha menyang, isun lan Ir mudhun ambi nyumpah-nyumpah sing karuwan. Dadi nurut isun, hang aran iwak uling serngangong iku mung mitos, tah mula isun sing ditumoni. Hang ana ya dhemit-dhemit hang nunggu Rawa Bayu penganggepisun lan Ir wong-wong hang cerita iku padha gubab lan ceritane ditambah-tambahi. Ya mula ana sih hang aran serngangong iku polae mulai cilik isun wis rungu tapi sak iki mula wis punah. Dadi isun nganggep cerita Serngangong Ring Rawa Bayu iku mung mitos.

 

SMHJ Kudus  27 Mei 2021

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : pengalaman pribadi

Editor: Hani Z. Noor