Moh. Noer Hafandi, Penggagas Ngadege Ikawangi

Antariksawan Jusuf (dipublikasikan pada Jumat, 11 Juni 2021 09:40 WIB)
- Tokoh



Lahan tepat untuk iklan anda di sini.

Hubungi: skb@belambangan.com atau WA telp 0811843457


"Sedurunge (gubernur DKI) Sutiyoso nggawe program Rumah Singgah, kene wis ana ide taun 1972,"  jare pak Moh. Noer Hafandi. Rumah Singgah iku hang kepingine dadi salah siji gunane ana paguyuban Ikawangi ring Jakarta.
   Pak Apandik celukane, iki salah siji wong hang nggagas anane paguyuban kanggo wong Banyuwangi ring Jakarta. Lulusan kawitan SMA Banyuwangi iki cerita maning wit perkawit anane paguyuban Ikatan Keluarga Banyuwangi (Ikawangi) nalika Ikawangi pindhah kantor sekretariat ring Jalan Tanah Merdeka dina Minggu sore.
"Ide paguyuban Ikawangi dikawiti ring karep kanggo ngelumpukaken wong Banyuwangi hang mboro golet penguripan ring Jakarta. Sak liyane wadhah silaturahim, paguyuban dadi panggonan jujugan wong Banyuwangi hang buru teka ring Jakarta minangka rumah singgah, nggawe kegiyatan sosial lan minangka wadhah kanggo kerjasama ambi pemda Banyuwangi," jare lulusan Fakultas Pertanian Universitas Brawijaya Malang iki.
   Aju sakteruse dianakaken pertemuan kawitan ring umahe pak Sutardjianto ring dhaerah Setiabudi ulan Pebruari 1972. Sangking semangate, hang diundang mung lima, wong hang teka ana 14.
   Hang milu teka yaiku ruwahe Hardjoko Saputro (asal Banyuwangi kota), Soetardjianto (Keradenan), Moh. Noer Hafandi (kota), Samsoel (Glenmore), Syafi’i (kota), Halawani (Parijatah), Soetrisno (kota), ruwahe Soetoyo L (kota), Sya’i (Benculuk), Mohamad Zein (kota), ruwahe Soegiyono (kota), Armaya (kota), Bardi (kota), Selamet Santoso (Glenmore).
   Jaman bengen magih durung ana android, dadi hang bisa dilakoni nyusun data anggota hang disebaraken. Teka pormulir hang mbalik, kecathet ana 230 uwong, jangkep sak alamate pisan.
   Sak teruse, paguyuban kepingin nganakaken iwuh pertemuan taping hing duwe picis. Hing kurang akal, panitia ngongkon wong telu yaiku Mayor cpm Slamet Santoso, Kapten polisi wong Genteng Samsoel lan Moh. Noer Hafandi ngadhep nang bupati Banyuwangi kala semono yaiku bapak Djoko Supaat Slamet.
Wong telu diterima bupati, Pak Paat celukane, tapi hing nong kantor, marek magerib.
"Kita ingin menampilkan gandrung di Jakarta." Jawabe Pak Paat: "Adik-adik gak usah repot, siapkan pentasnya. Soal gandrung dan kru tanggung jawab pemda." Iki hang dianten-anteni jare Pak Apandik.
Pungkasane, panitiya girang lan milu ngundang penyanyi Ulan Andung-andung yaiku Emilia Contessa.
   Pak Paat ngirim tim kesenian nyang Jakarta kelebu biyaya akomodasi, transportasi lan liyane.
   Pungkase cerita, pentas lan silaturahim kawitan digelar ring Taman Ismail Marzuki tanggal 16 September 1972. Tanggal iku didadekaken tanggal laire Paguyuban Warga Banyuwangi Jakarta Raya hang disingkat PEWANGI JAYA. Tanggal iki uga kecathet ring Kartu Tanda Anggota Ikawangi Pusat saiki.
   Penguruse yaiku Moelyadi (ketua umum), Soetardjianto (wakil ketua), Moh. Noer Hafandi (sekretaris), Hardjoko Saputro (bendahara).
    Susunan pengurus lan sesepuh iki teka latar buri macem-macem: anggota DPR RI (KH Abdul Latief, Abdul Madjid, Soedardji, Atmo Sayono), pegawai Pemda DKI (Kusnan Ismukanto, Soetardjianto, Moh. Noer Hafandi), anggota militer (Yusuf Ramelan, Slamet Santoso, Samsoel, Syafi’i, Halawani, Abdul Kadir, Soetrisno, Soeroso, Soehairi, Aminullah Ibrahim, Moh. Zein, Bardi), budayawan (Armaya), serta pekerja swasta (Sa’adah, Malik Kaempuan, Yono Rusdi, Soemandi).
    Hang disepakati, paguyuban iki nganakaken arisan ring umahe anggota, nggawe pengurus ring limang wilayah Jakarta, ngubar inpormasi nang anggota lan nggawe iwuh gedhe setaun sepisan.
   Taping saya suwi paguyubane saya kimples. Sampek-sampek antarane taun 1985-1990 nana kegiyatan blas.
   Aju taun 1991, ana wong Banyuwangi
H. Abdul Kahfi diangkat dadi walikota Jakarta Pusat.
    Sak mareke upacara sukuran ring umahe, Jalan Diponegoro, wong-wong sepakat milih H. Boesairie Abdullah minangka ketua paguyuban Banyuwangi hang anyar. Lan aran Pewangi Jaya diuwah dadi Ikatan Keluarga Banyuwangi (Ikawangi) seperene.
    Hang madeg dadi ketua umume yaiku:
1.      H. Boesyairie Abdullah (1991 – 14 Des 1997)
2.      H. Moelyono Moenawar (ruwahe) (14 Des 1997-15 Sep 2002)
3.      H. Hanipan (15 Sep 2002-Sep 2006)
4.      H. Bambang Soegiono (Sep 2006-Jan 2012)
5.      H. Bambang Soegiono (Jan 2012-seperene)

Mangkane kelendi-kelendiya Pak Apandik seru ngamuke kadhung ana wong hang nyobak ngerusak aran Ikawangi. Umpamane, ngurusi politik ring grup Ikawangi.
   "Aja nyeret-nyeret politik, Ikawangi kudu bebas politik," jare wong hang kesuwur ring aran Andi Uweng, polae jaman bengen paceke korengen. Umahe parek kandhang sapi hang akeh keponge, kadhung udan-udanan kepong sapi mau nyampur ambi banyu udan hang dienggo kecek, sampek ndadekaken korengan. Andi koreng, merga pelat dadi Andi Uweng.
"Kadhang hang enom lali sampek ngeliwati garis abang."

   
  

   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor