Niteni lan Nyathet Kebudayaan Banyuwangi
Antariksawan Jusuf (dipublikasikan pada Kamis, 29 Agustus 2024 08:45 WIB)
- Laporan
Badan Pelestarian Kebudayaan Wilayah XI (Jawa Timur) hang ana ring Mojokerto dina Rebo (28/8) nggelar sarahesan ring Banyuwangi sak perlu niteni lan nyathet budaya paran bain hang ana ring kene.
BPKW XI, ring ngingsore Kementrian Pendidikan, Kebudayaan, Riset lan Teknologi, ngundang sasate kabeh dinas, pemerintahan desa, organisasi, akademisi, budayawan, lan uwong-uwong pelaku adat budaya kayata Mak Temu gandrung, Man Ino, sampek nang tukang kiling Pak Jamiidi lan tukang tulup Pak Hairudin.
Kepala BPKW XI Bu Endah Budi Heryani nyebutaken pirangane Undang-undang hang dadi lemeke, kayata pirangane UU hang perinthilane kelebu ana Pelindungan, Pengembangan, Pemanfaatan, Pembinaan. Ana Perpres ngenani Strategi Kebudayaan kelebu rekomendasi hang perlu dilakoni.
BPKW iki minangka Satuan Pelaksana Teknis teka dirjen Kebudayaan. Sak Indonesia kantore ana ring 23 panggonan.
Badan iki ngurusi hang katon lan hing katon. Hang katon kaya candhi sampek hang hing katon (Tak Benda) studi restorasi.
Paran bain hang kelebu budaya? Moh. Edi Seputro teka Pendamping Kebudayaan (Daya) desa Kemiren, njelentrehaken ana 10 hang didaptar. Yaiku 1. Tradisi lisan 2. Manuskrip 3. Adat Istiadat 4. Ritus/ritual 5. Pengetahuan tradisional 6. Teknologi Tradisional 7. Seni 8. Bahasa 9. Permainan Rakyat 10. olahraga Tradisional.
Dene narasumber Mbok Wiwin Indiarti teka Uniba ngengetaken setemene Banyuwangi wis duwe Peta Jalan Pemajuan Kebudayaan Daerah Kabupaten Banyuwangi 2021-2025.
Jare Mbok Wiwin Peta Jalan hang disusun ambi Bappeda setemene wis jangkep, teka nitenine, masalahe sampek paran rekomendasine.
Kebudayaan Daerah kadhung ring Banyuwangi mesthine hang dierah ya kebudayaan Using. Masiya Banyuwangi iku multikultural, hang urip ring Bantuwangi iki wong teka akeh suku. Cumpu nong Perda Pelestarian Budaya, masiya kawitane nyebut kabeh unsur budaya naming hang disebut ping kaping-kaping ring njerone yaiku mung basa lan sastra Using. "Masiya akeh hang nyerintungi, giyate terus dilakoni, semangate kanggo nguri-uri wis katon."
Kadhung pelestarian budaya Using, durung ana kepastiyan secara hukum. Merga budaya Using iku obyek, dene hang dadi subyeke masarakat adate.
Hang perlu mung kari sokongane hang durung patiya melaku. "Mangka saiki wis taun 2024, dadi kurang setaun engkas, paran hang wis dituruti rekomendasine nong kene iki?"
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
