Perewangan ring Keseniyan Tradhisional (Bagiyan 2 pungkas) 2)

Antariksawan Jusuf (dipublikasikan pada Kamis, 06 Juni 2024 06:42 WIB)
- Opini



Perewangan ring Keseniyan Tradhisional (Bagiyan 2, pungkas)

Ring keseniyan gandrung, perewangan biyasahe dienggo kanggo ndadekaken gandrung bisa duwe kekuwatan sanggup njuged suwengi sing kathik ngepos lan nguyuh. Sedurunge gandrung terob mangkat biyasahe ngelakoni ngirim nyang mbah buyut utawa sapa bain hang dianggep bisa dienggo rewang ring suwengi tontonane. Pawang utawa emak-emakane biyasahe hang ngelakoni sarat lan nyiyapaken uba rampe hang dienggo ngelakoni ngundang perewangan mauka.

            Sak liyane iku magih ana adat lan seni Seblang lan Kebo-keboan hang magih nganggo kekuwatan liya kanggo nganakaken keseniyan iku. Perewangan arupa danyang kang aran “Dewi Sri” iki mau kaya wis urip ring alam menungsa iki. Kadhung penari Seblang lan penari Kebo-keboan sing ndadi bisa diarani seni tari iki magih durung dilakoni. Bisa diomong tari iki sing bisa ana kadhung penarine sing ndadi utawa kerasukan perewangan.

KEPERCAYAAN HANG MAGIH DIUGEMI

            Kadhung ana hang ngarani keseniyan tradhisional iku kelebu nyang kepercayaan animisme lan dinamisme, pancene kebukti teka ciri lan wancine nuju merana. Iki sing salah merga anane keseniyan tradhisional iki mula wis ana sedurunge kepercayaan Islam melebu nong tanah Jawa iki. Ana uga hang ngubungaken keseniyan tradhisional iki ambi Siwaisme, yaiku kepercayaan nyang dewa Siwa hang digawa wong-wong ring sedurunge jaman Majapahit melebu nyang Banyuwangi.

            Keseniyan tradhisional hang ana ring Banyuwangi dhung dideleng teka pengaruhe kekuwatan liya hang ana ring kekuwatane menungsa iki saktemene keneng dilebokaken ring periode kesenian primitip yaiku periode keseniyan hang ana ring sakdurunge jaman kerajaan. Ring jaman iku kepercayaan nyang kekuwatan hang linuwih hang ngelebihi kekuwatane menungsa magih dipercaya ana ring roh, danyang, lan paran bain hang dianggep nguwasani panggonan ring alam donya.

            Kekuwatan-kekuwatan iku dianggep bisa melebu nyang alam donya, nung alame menungsa lan bisa nggawe paran bain kaya hang dikarepi kekuwatan (perewangan). Mesthi bain kepercayaan hang gedigi iki sing bisa melebu ring akal ring jaman modheren saiki. Naming ring njerone keseniyan tradhisional anane kekuwatan iki justru dianggep bisa nganani anane keseniyan tradhisional iku dhewek. Kadhung anane Perewangan diilangaken ring njerone keseniyan tradhisional mesthine ya padha bain ambi ngilangi keseniyan tradhisional iku.

Moh. Syaiful

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Moh. Syaiful

Editor: Hani Z. Noor