Plagiat ring Gendhing Banyuwangi (Bagiyan 2, pungkas)

Antariksawan Jusuf (dipublikasikan pada Selasa, 02 Juli 2024 06:36 WIB)
- Opini

Plagiat ring Gendhing Banyuwangi (Bagiyan 2, pungkas)

Mangka lagu bengen iku akeh hang penganggite kasebut anonim, artine sing diweruhi sapa hang nganggit. Tembang iku mau diihlasaken dadi duwene masarakat. Sapa bain arep nggawa sing perlu mbayar royalti utawa sak sithik-sithike ngucap kesuwun nang penganggite. Lha arep mbayar utawa ngucap kesuwun nang sapa, wong penganggite sengidan?
   Perkembangane jaman, kira-kira taun 1970-an industri musik mulai ngerambah Banyuwangi. Seniman-seniwati Belambangan milu ngerasakaken lebih keangkat maning derajat lan martabate liwat karya-karyane. Uga dadi bisa tambah luas hang bisa ngapresiasi karya-karyane. Ahire mulai padha nduweni ngipi seragam, yaiku kepingin ngerubah derajat uripe liwat dalan kesenian. Kaya dene cerita liya-liyane, ana hang berjuwang uled, jujur, njunjung kehormatan pribadine. Ana uga hang nduweni polah hang penting kelaksan embuh kelendi cara lan dalane. Waktu iku karyane arupa cassete jare wong Banyuwangi kaset. Era manual, durung digital. Prosese ruwed lan alate larang. Rekaman kudu nang Surabaya utawa Jakarta. Nggawe album dadi barang mewah. Mung seniman-seniman pilihan lan hang nduweni nasib apik hang bisa ngerasakaken kemewahan iku mau. Pencipta lagu hang durung tau lagune direkam dianggep pencipta kelas loro. Kadhung nduwe lagu apik kepingin lagune iku mau direkam mangka aja nganggo arane dhewek, naming lagu iku mau kudu dililakaken penciptane kanggo diakoni pencipta kelas siji. Alasane kadhung ditulis arane pencipta aseline, wong Surabaya hing gelem ngerekam. Ceritane urip terus mili, jaman terus uwah. Cerita gedigu iku mau sing ana maning wis ring kalangan seniman/artis Banyuwangi jaman saiki. Hang ana, penganggit plagiat jaman saiki njuwut melodine lagu manca, diuwah sithik aju digawekaken lirik basa Using mari digu didelehi arane dhewek hang dadi penganggite. Hang seru keserone, ana lagu hang njuwut plek melodi lagu manca sing kathik diuwah sithika belaka mung digawekaken lirik basa Using aju diakoni gok iku ciptaane.
   Apuwa sing ana pencipta lagu Banyuwangi dituntut kerana plagiat lagu manca iku mau? Jawabane kerana pencipta plagiat bisa diajukaken ring pengadilan kadhung pencipta hang dijiplak karyane mau nuntut. Ale lagu dhaerah Banyuwangi semebar mung ring wilayah Banyuwangi. Sak wera-werane Pulau Jawa. Sedheng hang dijiplak wong manca hang nawi bain sing weruh. Utawa kadhung weruha hing nyucuk biyaya, wektu, tenaga lan pikiran kadhung miloni proses nuntut. Dadine penganggit plagiat mauka aman sampek saiki lan terus ngelakoni laku plagiate iku mau. Hang sing bisa dialesi hukum etika lan sangsi moral teka masarakat penikmat lagu dhaerah Banyuwangi dhewek hususe lan masarakat Banyuwangi umume. Naming kabeh iku mau ya balik maning ambi tingkat kecerdasan apresiasi musik ring masarakate. Prodhuk seni budaya hang ana ring masarakat iku sak dalan ambi masarakate. Utawa kadhung kepingin weruh kuwalitas salah sijine masarakat, delengen teka kuwalitas karya seni lan budayane.

Mas Robin

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.