Resto Kemarang Ijen Park lan Tandha Welas 50 Taun Umah-umah

Antariksawan Jusuf (dipublikasikan pada Rabu, 04 Oktober 2023 05:49 WIB)
- Laporan



Paran hang cocog kanggo hadhiyah mengeti 50 taun umah-umah aliyas perkawinan emas?
  Ana wong Rogojampi hang uga tau dadi kepala personalia PT Krakatau Steel, Pak Sumono Abdul Hamid, ngewani rabine, Bu Anis, umah tradhisional hang uga dadi warung. Mesisan warung iki bisa nyuguhaken panganan tradhisional, hang dadi hobi rabine masiya rabine (hang uga embok penggarepe Pak Arif Yahya menteri pariwisata dhongkol) hing milu dodolan ring kono.
   Setemene, 50 taun dina kemantene ring tanggal 20 Desember 2020, naming ketanggor ambi pageblug. "Dadi kasep telung taun," jare Pak Sumono.
   Sak mareke pageblug, umah tandha welas iku kudu ngadeg. Mangkane ring kono ana panggonan selfie hang wujud godhong waru ambi angka 50.
  Hang entheng picise ya umahe digawe teka kayu kelapa merga Pak Sumono nduwe akeh wit kelapa ring kebonane noring desa Segobang. Wite diedol ya hing ana hang gelem nuku masiya wite tuwek merga panggonane akeh ring perengan hang nggarahi sara nggawa gelugune.
   Aju Pak Sumono njaluk tulung Kent Ali, wong Gombeng hang tau nggawe umah tikel teka gelugu ring Gombeng.
   Kadhung mung umah tikel teka gelugu iki hing istimewa, hang arepe dibangun iki kudu istrimewa, dadine Pak Sumono njaluk umah panggung tradhisional hang kayane durung ana ring Banyuwangi. Saking semangate, tegoran gelugu hing ditugeli ring Segobang naming digawa nyang Gombeng disigar dienggo saka, dur, usuk lan tunggalane digawa balik nang Kenjo sampek umahe ngadeg.
   Kent Ali iki sekretaris organisasi KOPAT (Komunitas Osing Pelestari Adat dan Tradisi) hang kerep ngundang kanca-kancane ring umah panggung hang buru dadi, kelebu Ketua KOPAT kang Wowok hang duwe resto Kemarang Taman Suruh.
   Merga panggonane apik ring pinggir lurung gedhe, Kang Wowok ngejak kerjasama bagi hasil, Pak Sumono nyedhiani panggonane, Kemarang  nyedhiyani modhal kerjane. Restone diarani Kemarang Ijen Park. Menu hang disuguhaken ya kaya ring Kemarang Taman Suruh. Dadi saiki tambah siji panggonan hang keneng dienggo mampir wong arep munggah utawa mudhun teka Ijen.
   "Pak Sumono akeh padhane ambi Isun, dhemen panganan tradhisional, dhemen nguri-uri kesenian, ngeregani lukisan. Dadi tepak kecaruk wis kaya tumbu ulih tutup," jare Kang Wowok, tepak ngebangi restone tanggal 1 Oktober sore nang belambangan.com.
   Kang Wowok iki seliyane duwe warung Kemarang, iyane wis 15 taun nyekel IT ring perusahaan asing yaiku Chevron.
   Hing maido ilmune dienggo ring warunge. Tau penilai teka Ijen Geopark, wong landa, nekani Kemarang hang kelebu partner-e Geopark.
   Wong Landa iku takon, iki paran ana QR code ring meja lan ana penthongan pisan?
   Kang Wowok cerita, masiya meja warunge panggone semebar, taping pelanggane magih bisa pesen liwat QR code mau tanpa nyeluk peladene. Mara-mara pesenane wis cemepak ring meja. Aju penthongane? Kadhung cumpu panganane hing teka, penthongane diteter dienggo nyeluk peladene
   Sakkal wong Landa iku semaur, "Ya gedigi iki semangate Geopark, nganggo teknologi anyar taping hing ninggal kebiyasahan tradhisional." Pantes bain, Kemarang bijine paling dhuwur kanggo partner-e Geopark Ijen.
   Ring Kemarang Ijen Park, Kang Wowok ya nggawa teknologi hang diarani KHARISMA (Kemarang Human Resources System). Para pegawene bisa absen liwat hapene. Kapan iyane teka, kapan mulih, lan manajemen bisa weruh lare hang absen teka umah.
   Kang Wowok hang uga kanca sekolahe Pak Arif Yahya hang nduwe teori 3 A kanggo suksese panggonan kelenceran. 1. A (akses), dalane nuju panggonan iku kelendi. Gampang tah uwong arep merono? Kadhung restorane iki ring pinggir lurung aspal gedhi panggonane wong seliweran nang Licin lan Ijen. 2. A (Atraksi). Ring kene ya padha ambi ring Taman Suruh, ana gandrung, ana angklung hang dadi atraksine. Sapa hang dadi gandrunge? Ya lalare hang megawe. Kapan bain dikongkon dadi gandrung, kabeh wis siyap. 3. A (Amenities). Ring kene ana kelengkapane kaya homestay, parkiran lan liyane, jare Kang Wowok.
   Cuma rada ana kurange, parkiran hang kurang wera. Kadhung ditekani bis wisata hang gedhi-gedhi bisane parkire ring njaba.
   Restoran lan umah panggunge hang ana ring Jl. Lijen km 6, desa Kenjo, Glagah iku wis cocog kaya impene Pak Sumono.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf