Ridzkiya Karimatus Sholeha: Pegiyat Sastra Using

Antariksawan Jusuf (dipublikasikan pada Jumat, 20 Agustus 2021 09:27 WIB)
- Tokoh



Lahan tepat untuk iklan anda di sini.

Hubungi: skb@belambangan.com atau WA telp 0811843457


Wis biyasah kene rungu wong ngomong “milu nguri-uri basa Using.” Minangka basa hang urip, basa Using ana basa lesan lan kudu ana basa tulise makene hing gedigu bain, mandheg merujuk lan diontal kala. Nah, hang milu nguri-uri basa Using tulis iki hing patiya akeh mula. Saben taun Paguyuban Sengker Kuwung Belambangan (SKB) sakat taun 2013 nganakaken Lomba Nganggit Cerita Cendhek Basa Using. Naskah cerita hang dikirim kira-kira saben taun munggah mudhun akehe sekitar ana 50 naskah. 
   Naming hang nggawe girang, teka Lomba iki metu aran-aran hang bisa-bisa dadi sengker lan papan merujuke basa Using mengarepe. Umpamane ana Moh. Syaiful hang ring taun 2016 novel basa Usinge hang nduweni judhul “Agul-Agul Belambangan”, menang lan ulih penghargaan Rancage ngalahaken karya basa Jawa liyane. Penghargaan iki hang kawitan kanggone basa Using. Setemene ana penulis Banyuwangi liyane hang tau menang Rancage, yaiku ruwahe pak Esmiet, taping iyane nulis nganggo basa Jawa.
   Ana pisan Muzakky El Fayed hang wis bolak-balik menang Lomba, pungkasane hing diulihi maning milu, taping diwani tantangan kongkon nulis cerita sak buku dhewek. Kumpulan cerita cendheke terbit taun 2019 kelawan judhul “Lancing Tanggung” hang akeh cerita bab uripe lare Boyolangu lan sak ubengane. Muzakky duwe gaya dhewek lan akeh nyathet ungkapan-ungkapan has Using Boyolangu. Kanggo ring lare wadon, ana Nur Holipah hang saiki rada keserimpet kemben, taping iyane wis tau nerbitaken kumpulan cerita cendheke sak buku bareng Moh. Syaiful hang nduweni judhul Jala Sutra. Putune seniman angklung teka Bades, Holip iki basane kentel, akeh njumbulaken ucap-ucap hang magih akeh dienggo ring Giri. Holip mula hing mung ahli nulis nganggo basa Using, taping cerita-ceritane akeh hang menang lan didadekaken kumpulan ring buku sakat iyane kuliyah ring Malang.
   Hang pungkasan, ana Ridzkiya Karimatus Sholeha, lair ring Banyuwangi, 6 Agustus 2001. Kiki, celukane, digedhekaken ring Kemiren-Lulian iki, mangkane deles seru basa Usinge. Iyane putune ruwahe Man Serad hang duwe wit duren abang lan ring sedina-dinane mula basa Usingan. Malah iyane rada perihatin ndeleng lalare enom lan kanca-kancane hang kaya ninggalaken basa Using. Tekade kanggo milu nguri-uri basa Using wis merujuk sakat iyane magih sinau ring Sekolah Dasar.
   Nduwe kepercayaan diri hang gedhi merga basa Using wis dadi sega jangan saben dinane, umur 10 taun iyane milu Lomba Basa Using, kategori Pidato Bahasa Using. Iyane dadi  menang Juara 1 rong taun tanpa mudhun.
Hang nggawe jempol, kemampuane nulis basa Using. Cerita-cerita hang ditulis mili kaya banyu lan kerep nggawe ungkapan-ungkapan hang ana ring lingkungane ring Lulian lan Kemiren. Seru Usinge! Wenak maca tulisane. Hing maido saben milu Lomba nulis cerita cendhek, iyane mesthi juwara. Tepak SMP, cerita cendheke “Kembang Peciring” wis dadi Terbaik 1 kategori SMP. Aju taun 2019, cerita cendheke uga bisa nembus Terbaik 1 lan 3 kategori SMA  kelawan judhul “Welase Kacang Unting” lan “Merga Donyane”. Mula saben penulis ulih ngirim maksimal telung tulisan. Sakat dadi hang Terbaik 1 lan 3, Kiki wis hing ulih milu maning. Taping ditantang nulis sak buku hang arep diterbitaken taun iki lan judhule “Kembang Galengan.” Buku iki ana 23 cerita hang ngerekam uripe wong-wong Using kelawan nganggo basa hang seru Usinge. Seru Lulian Kemirene. Carane nulis, nggarai hang maca milu melebu ring njerone umahe wong Using, weruh kedadeyan saben dina, weruh perasaan anak-anak nang wong tuweke, weruh larane sikil hang kebaret damen tepak ngarit suket. 
Kiki iki lare hang nduwe kemampuan akeh, hing mung nulis cerita cendhek. Iyane ya dhemen nulis gurit. Karyane tau melebu kategori 100 puisi terbaik kang didadekaken ring Buku “Menggandrungi Banyuwangi” 2019, uga dadi puisi paporit pembaca. 
   Prestasi dhuwur kang tau digape, Kiki tau makili sekolahe uga dadi wakile Banyuwangi ring Lomba bergengsi, FLS2N Propinsi. Kiki makili ring bidang nulis cerita cendhek nganggo Bahasa Indonesia, lan mulih nggawa hadhiyah Juara 2. Maning-maning budaya Banyuwangi kang digawa.
   Bisa diarani multitalenta merga iyane ya bisa paran bain, hing mung nulis tapi uga  gendhingan, njuged, sampek celathu. Iyane ya tau makili sekolahe ring ajang Murid Teladan Berprestasi kang pesertane diwajibaken lancar nang akeh bidang, lan iyane bisa dadi Juara 3 kala iku. Malah tau ulih piala ring bidang olahraga futsal, masiya saiki mandheg. 
   Ring Kiki, muga-muga basa Using tulis tambah gelis merujuke. Basa Using tulis iki mula rada melarat jumlah ucap-ucape. Delengen bain kamuse, hang buru kecathet mung ana kira-kira 24.000 ucap. Bandhingaken ambi basa Indonesia 120.000 ucap. Dadi kadhung hing ditambah-tambahi, saya suwi basa Using saya adoh kelalen nong mburi. Kelawan nyathet ucap-ucap hang ana lan nambahi hang durung, muga-muga basa Using bisa saya jejeg.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor