Singojuruh Bumi Angklung (Bagiyan 1 teka 2)

Antariksawan Jusuf (dipublikasikan pada Jumat, 23 Agustus 2024 08:22 WIB)
- Opini

Singojuruh Bumi Angklung

Ditulis ring Hasan Sentot

Singojuruh, bengen kawitane arane Singomanjuruh. Kawasan hang dadi salah sijine Kecamatan ring Banyuwangi emeh 90 persen dipanggoni wong Using. Sisa-sisa laskar Belambangan. Mangkane sing heran, ring Kecamatan Singojuruh iki akeh werna maceme Kesenian hang aseli Banyuwangi, teka janger, angklung, praburoro, kuntulan, drama, gembrung, angklung lan liya-liyane ana ring kene.

Kadhung nyebut seniman, ana aran ruwahe Pak Sahuni (tau dadi lurah Singojuruh), iku panjak hang pungkasane bisa sekolah seni sampek dadi koreograper kondhang. Ana ruwahe Gandrung Poniti, utawa Mbok Pon, iku malah lebih lawas dibandhing Mbok Temu, ana Man Bodos, bengen tukang kerek Drama Kedunglewung, Ana Man Awi, Badhut Angklung Semalang Lor. Lan aran liyane hang milu ngeliri mekar mekroke kesenian ring Banyuwangi.

Ngomong Angklung, akeh grup angklung lawas hang asale teka Singojuruh. Ana Angklung Pasinan, Angklung Bolot, Angklung Semalang Lor (Alasmalang) lan liya-liyane. Malah akeh hang ngomong, larasan Angklung teka wilayah Singojuruh iki kelebu larasan kuna hang saiki magih dijaga ngadeg jejege ambi seniman ring kana.

Sak liyane akeh seniman-seniman tradhisi ring wilayah Singojuruh iki, uga akeh tukang nggawe gamelan lan angklung (perajin) sakat bengen seperene. Mulane lare-lare wilayah iki, akeh hang penter nabuh angklung lan gamelan Using. Merga sakat cilik wis kulina ndeleng wong nggawe gamelan, ngelaras lan tabuhan.

Ndeleng kesugihane Singojuruh nang bab kesenian lan seniman mau, camat Singojuruh dhongkol, Moch. Lutfi tau duwe kerenteg kepingin ndadekaken wilayahe dadi Bumi Angklung.

Kahanan Geografis Singojuruh

Dideleng teka wilayah geografis, Kecamatan Singojuruh kelebu kecamatan hang manggon ring tengah wilayah Kabupaten Banyuwangi. Pinggir elor diwatesi Kecamatan Songgon lan Kecamatan Kabat. Pinggir kidul diwatesi Kecamatan Srono, pinggir wetan diwatesi Kecamatan Rogojampi lan Pinggir kulon diwatesi Kecamatan Sempu dan Kecamatan Songgon. Topografi wilayah Singojuruh akeh-akehe lemah rata, sithik ana puthuke.

Kecamatan Singojuruh ana ring panggonan lemah dhuwur, ambi dhuwure antarane  145–220  meter  ring ndhuwure segara. Desa hang dhuwur yaiku Desa Sumberbaru lan desa hang paling endhep Desa Benelan Kidul lan Desa Lemahbang Kulon. Kecamatan  Singojuruh  dipara dadi  11 desa, antarane desa Gambor, desa Singojuruh, desa Alasmalang, desa Benelan Kidul, desa  Lemahbang  Kulon,  desa Singolatren, desa Padang, desa Cantuk, desa Gumirih, desa Kemiri lan desa Sumber baru

Kecamatan Singojuruh nduweni wera wilayah 59,89 kilometer persegi,  diliwati banyu mili yaiku Banyu Kemapak, Banyu Tuban, Banyu Bate, Banyu Rawan, lan Banyu Kumbo. Teka werane wilayah mau, akeh-akehe arupa lemah tetani. Mangkane sing heran kadhung warga Singojuruh akeh-akehe megawe ning sawah. Aju disusul industri, merga ana pabrik jaket kanggo ekspor hang manggon ring Garit, Alasmalang dan kerajinan bordir ring Gambor. Uga kerajinan monte ring Desa Padang. Pegaweyan liyane dagang. Cacahe pendhudhuk Singojuruh miturut sensus taun 2016 ana 45.607 Jiwa. 

Mula Kawite Singojuruh

Aran Singojuruh iku mula kawitane teka aran pejuwang jaman Perang Bayu, arane Singomanjuruh.  Wilayah perang iku bengen diarani Mandala Wetan, Belambangan. Singomanjuruh dhewek peteran perang teka Malang, pengawale Adipati Malang lan Adipati Blitar. Kadhung mimpin perang mula sing ana watese, tekade gedhe lan dibelani sampek adus getih. Wayah sakmono Singomanjuruh  mimpin 700 pasukan, sampek komandan perang musuh mati ngenes. Komandan perang Kompeni liyane awake kaku keneng panah racun warangan. Racun mau nyebar sak awak, sing keneng ditambani. Singomanjuruh pungkasan ya sampek umur ring panggonan iku mau, aju kanggo ngeregani jasa lan tekade Singomanjuruh aju panggonan iku diarani Singomanjuruh. Naming sing weruh sakat kapan, panggonan iku sampek saiki kejuluk Singojuruh.

Miturut Sumono Abdul Hamid, wong Kemiren, Alasmalang hang duwe kawigaten nang sejarah, sakat Perang Blambangan taun 1768-1772, sampek Pergolakan Lemahbang hang dipimpin Al Mukarrom K.H.Abdullah Fakih, Singojuruh wis dikenal wilayah perjuwangan. “Buktine, ring pinggir dalan antarane Kesatrian, Rogojampi  sampai Temuguruh, Sempu, antarane taun  1960an, akeh makam utawa kuburan ring dalan iku. Iku makame para pejuwang,” jare Pak Sumono hang saiki manggon noring Tebet Jakarta.

Singojuruh sakat bengen tanahe subur, malah sakat jaman Landa ana pabrik beras lebih teka siji lan pabrik lenga kelapa (kopra) nomer 2 hang paling gedhi ring Jawa Timur. Naming suwe-suwe bangunan iku ilang embuh paran sebabe. Kelebu Setasiyun Singojuruh, saiki sing diendhegi sepur teka Surabaya, mung sepur teka Jember.  “Umah Belambangan hang akeh gebyoke lan kuwat, bengen ya keleleran nang endi-endi. Saiki ilang, uga bangunan kukuh tinggalane Landa akeh hang ajur merga sing kerumat. Wilayah Singojuruh hang dipedhot-pedhot, ndadekaken wilayah iku aju dilalekaken,” ujare Sumono getun.

Bukti liya kadhung Singojuruh iku bengen wilayah hang maju, wargane jaman sak mono wis akeh hang sekolah dhuwur. Ana Dokter Satriyo hang dikenal minangka dokter gerilya, tau dadi Menteri Kesehatan RI Jaman Presiden Soekarno, umahe magih ana ring sebelahe Kantor Kecamatan Singojuruh. Saiki arane dadi aran dalan gedhi ring Jakarta. Mayor Jendral Marinir Gatot tau dadi  Pangarmatim ring Surabaya. “Magih akeh putra-putri Singojuruh hang nggawa arume aran dhaerahe,” pungkas mantan personalia Pabrik Baja Krakatau Steel iki.

(Ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.