Singojuruh Bumi Angklung (Bagiyan 2 pungkas)

Antariksawan Jusuf (dipublikasikan pada Sabtu, 24 Agustus 2024 09:13 WIB)
- Opini

Singojuruh Bumi Angklung

Serta weruh bengen lan saikine, pungkasane Pak Luthfi tepak magih madeg dadi camat Singojuruh aju duwe program ndadekaken Singojuruh Bumi Angklung. Program iki dudu milu-miluwan, makene anjrah aju dikenal uwong thok. Bukti lan nyatane, kesugihan ring kesenian mau mula wis sakat bengen. Aran kelompok Angklung Caruk ya akeh, malah hang tukang nggawe angklung ya sepirang-pirang. Paran maning aran seniman lan panjak angklung, meh saben desa ana panjak angklung.

Alame hang subur, sak liyane donya tetanen uga kebonan. Tanduran jajang ya gemelar ring pinggir alas lan jurang pinggir banyu, kabeh mau keneng dienggo nggawe bakalan angklung. Kanggo nengeri program iku mau, arep digelar pentas husus hang ngajak wong-wong sak Singojuruh nabuh Angklung bareng sampek ana sewu uwong. Mulai lare sekolah, lare enom-enoman, seniman panjak lan warga umum. Suwene setahun pungkasan, akeh panjak-panjak hang wis perei memengan angklung, rungu ana program iki mau aju njingkat lan milu cawe-cawe.

Pentas iku mau mung kanggo tandha, sak mareke iku sak dawane wayah, kadhung arep kepingin weruh nabuh Angklung Banyuwangian ya teka nang Singojuruh. Kadhung kepingin ajar tabuhan angklung ya disedhiyani guru nabuh. Malah serta arep ana rencana program iki, Kang Tohan, utawa Kang Toh, saben soren ditekani lare-lare cilik nyang umahe, ambi diateraken wong tuweke, sak perlu njaluk diajari nabuh angklung.

Kanggo wong njabane Singojuruh, aju teka merana kepingin nabuh angklung ning umahe, engko uga disedhiyani angklung kanggo cangkingan (suvenir), taping larase bener lan keneng ditabuh kanggo ngiringi gendhingan. Program iki sing terima sak gerebegan, taping karepe bisa terus-terusan, nublek napung lan ana mampaate kanggo wong Singojuruh dhewek.

Kanggo mujudaken kabeh mau, saiki seniman, pemerintah Kecamatan dan Desa ring Singojuruh padha 'jungkir walik" nata-nata, latihan lan kumpulan raina bengi kanggo mbahas angklung iku mau. Muga-muga bisa kasembadan paran hang diangen lan dikarepaken warga Singojuruh. Dadiya tetenger kanggo anak putu mbesuk, kadhung wilayah iki tau lan bisa ngembangi nang mekar mekroke kesenian ring telatah Belambangan umume.

“Singomanjuruh Bumi Angklung, yaiku konsep jujugan wisata hang nggambaraken kadhung Singojuruh minangka wilayah asal usul utawa penggonan kesenian angklung hang paling tuwek ring Banyuwangi. Sakat bengen, kadhung Angklung teka Pasinan, utawa Semalang Lor tanggapan, mesthi akeh penontone. Paran maning wayah caruk Pasinan musuh Mangir, sampek kutah aran hang ndeleng,” ujare Kang Lutfi.

Proses nggawe angklung, mulai milih jajang, ngeruti dadi patrol aju diunting ring ancak, uga dadi totonan hang apik lan langka. Kabeh mau nganggo selametan, sampek teka ngelaras lan angklung siap ditabuh. “Malah arep negor jajang bain ana pitung naga dina hang apik, dibelani puwasa makene ulih jajang hang larase apik.  Iki yara sing akeh diweruhi wong liya, dikira padha ambi kerajinan biyasah. Iki engko bisa dadi unggulan dhaerah Singojuruh,” tambah Kang Lutfi.

Hawa Angklung ring Singojuruh, uga arep digenepi Patung Angklung gedhi wayah arep melebu wilayah Singojuruh. Kanggo pengenget, kadhung wis melebu wilayah Singojuruh. “Ring RTH Singojuruh, uga ana Umah Angklung. Keneng dienggo belajar nabuh lan takon-takon masalah angklung ambi seniman lan pelatih hang disedhiyakaken ring panggonan iku,” pungkase Kang Lutfi hang uga Ketua Lesbumi PCNU Banyuwangi dhongkol iki.

(Hasan Sentot)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.