SKB Arep Nggelar Lomba Ndongeng Nganggo Bantuwan AI

Antariksawan Jusuf (dipublikasikan pada Sabtu, 10 Agustus 2024 08:35 WIB)
- Dari Redaksi

Paran tantangane mulang basa Using ring sekolah? Seliyane infrastrukture kaya buku materi, buku tambahan, akehe guru, guru hang basa sabendinane dudu basa Using, sikap keluwarga nang basa Using yaiku kurange medhiya hang nganggo basa Using ring njaba.
   Dadi sakwise lalare sinau ring kelas, ring njaba kelas kurang ana sarana liyane hang nganggo basa Using.
  Hang paling apik ya ana program telepisi, radhiyo, majalah, koran lan medhiya liyane hang nganggo basa Using.
   Kanggone paran basa Using iki? Kelendi contone? Dadi basa Using kaya hang diimpekaken ruwahe Pak Hasan Ali, penganggit Kamus Using-Indonesia yaiku basa Using keneng dienggo ekspresi ring macem-macem kahanan, dadi basa formal. Keneng dienggo sarana nulis tulisan ilmiyah, dadi basa sastera ring novel lan liya-liyane kaya adate gunane basa.
   Sakat taun 2013, Paguyuban Sengker Kuwung Belambangan (SKB) wis ngupayakaken kelawan nerbitaken buku-buku kanggo lalare kayata Isun Dhemen Basa Using, Nganggit Nganggo Basa Using, buku kumpulan cerita cendhek Kembang Ronce hang terbit saben taun sampek taun 2023, novel, buku sejarah lan Lomba Ngarang Cerita Cendhek kanggo isine Kembang Ronce.
   Merga medhiya sosial saya nyeren kahanan lan teknologi saya edan, nggampangaken penggaweyan hang bengen kudu dilakoni itungan ulanan saiki mung itungan jam. Kaya dene wong nggawe pelem dokumenter utawa dongeng.
   Saiki mung nganggo HP, uwong bisa syuting, ngedhit gambar, ngewani ilustrasi musik, dubbing dadi siji. Kadhung bengen, nggawe buku dongeng leren njaluk tulung ilustrator buku, saiki wis bisa njaluk tulung Artificial Intelligence (AI).
   Gambar ilustrasi bisa dadi kelawan itungan detik, malah ceritane bisa takon pisan ngongkon AI hang nggawe. Kadhung bengen nerbitaken buku cerita mbutuhaken waktu ulanan teka ngarang ceritane, editing, proofreading, nggawe ilustrasine, nggawa nang percetakan, sampek distribusine, saiki kabeh mung mbutuhaken wektu itungan jam. Teka nggawe cerita, ngedhit, ngewani ilustrasi musik sampek tayang (distribusi). Edheng?
   Liwat channel TV Bain, SKB wis nggawe pirangane cerita hang kaya gedigu iku.
   Ring ulan September kesuk iki, SKB arep ngejak wong-wong Banyuwangi ring Lomba Ndongeng Nganggo Bantuan AI. Paling using nganggo Bing, Canva, Capcut hang geratis wis cukup dienggo nggawe cerita kaya hang wis dilakoni SKB. Paran maning hang gelem telaten bisa nganggo AI liyane kanggo nulis dongenge, nggawe animasi hang ubah sampek cara-cara liyane kanggo apike dongeng. Paran maning nganggo AI hang mbayar.
   Lombane iki engko ngerebutaken Piyala Asmorowati kanggo ngurmati ibuke wong hang mbantu Lomba iki bisa kelaksan.
   Rencanane, arep ana Pelatihan Ndongeng Nganggo Bantuan AI.
   Antenana pengumuman sak jangkepe ya?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.