SKB Marani Komunitas Diundur, Merga Pageblug Corona

Hasan Sentot (dipublikasikan pada Senin, 23 Maret 2020 10:32 WIB)
- Dari Redaksi



Acara literasi  "SKB Marani Komunitas"  diundur,  merga antere pageblug kang aran Virus Corona ring negarane dhewek. Paran maning angger-angger dhaerah lan panggonan hang dienggo acara, ngetokaken pengumuman kadhung ulan Maret/April sing ana kegiatan ring Kampus. Alae lare-lare wis tata-tata kanggo mapag acara, kelebu uga ngubungi calon-calon peserta hang akeh-akehe mahasiswa. 

Ketua Paguyuban Sengker Kuwung Belambangan (SKB), Antariksawan Jusuf negesaken gok acara hang saktemene kanggo nguri-uri basa Using kudu diendheg sedhela sulung nganteni kahanan kang lebih apik, lebih sehat.

Sadurunge, SKB wis nggawe rencana megawe bareng kumpulan Keluarga Pelajar dan Mahasiswa (KPMB) Surabaya lan Ikawangi Malang tengah ulan Maret iki. Lan ring pungkasan ulan ambi kelompok Pemuda ring Desa Mangir lan Lemahbang Dewa Kecamatan Rogojampi.

Lahan tepat untuk iklan anda di sini.

Hubungi: skb@belambangan.com atau WA telp 0811843457


“Sakjane acara ring Mangir wis siap kabeh, Kerawat Desa mari-mari senenge ana rencana pelatihan iku. Naming mbarengi ana pengumuman teka Pemerintah Pusat, aju Camat Rogojampi nggawe Surat Edaran kadhung sing ulih ana kegiatan kumpul-kumpul. Pungkasane aparat Desa sing wani ngelanggar, lan milih murungaken kanggo sementara”, gedigu penjelasane Moh. Syaiful Pengurus SKB hang terus komunikasi ambi Aparat Desa Mangir lan Lemahbang Dewo.

Semono uga hang ring Surabaya lan Malang, lare-lare Mahasiswa hang dadi panitia wis ngubungi hang ngurusi gedhung. Malah ring Malang, karepe manggon ring Kantore Pak Ahmad Habib, Dosen UNMUH Malang asal Gintangan, Blimbingsari. “Ya kelendi maning, ana pengumuman teka Rektorat digu. Isun setemene wis ihtiyar nyang cafe-cafe ring malang kanggo wong 50. Naming masalahe, peserta akeh hang mulih kampung merga preian lan belajar teka umah”, digu penjelasane sesepuh Ikawangi Malang Raya iki.

KPMBS UINSA Surabaya, kawitane arep ngundur teka tanggal 21 Maret nyang 5 April 2020. Pengumuman teka Rektorat UINSA kawitan mung mbatesi kegiatan sampek 19 Maret 2020, aju mara-mara ana pengumuman maning miloni ketentuan Pemkot Surabaya lan Pemprov Jawa Timur, kabeh kegiatan sing ulih sampek April. “Nggih kula mboten wantun ajeng meksa, malih kanca-kanca hang sak durungi nahan mboten wangsul ngenteni acara Workshop. Sak niki empun wangsul sedaya, mergi preine tambah”, jare Awang, Ketua KPBMS UINSA Surabaya asal teka Muncar.

Acara iku rencanane diiseni materi carane nulis fiksi lan non fiksi ring media, hususe hang nganggo basa Using. Uga sejarah basa Using lan latihan ngeja basa Using. Kadhung materi hang arep diajaraken apik seru kanggone lare-lare, paran maning lare KPBMS UINSA saiki duwe Web dhewek. Karepe lare-lare kadhung ana pelatihan iku, lare-lare Mahasiswa bisa ngisi Web ambi meratekaken carane nulis paran bain hang diweruhi.

SKB nduweni wigati gedhe nong literasi basa Using. Sakat taun 2013, sakliyane wis nerbitaken lebih 25 buku hang nganggo basa Using, uga saben taun nggawe pelatihan nulis lan Lomba Ngarang Cerita Cendhek Basa Using kang asile didadekaken buku minangka asil pungkase.

Taun iki Lombane ditutup tanggal 1 Juni lan pemenange arep diumumaken pertengahan Juni 2020.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf