Tali Asih Kanggo 100 Seniman, Budayawan

Antariksawan Jusuf (dipublikasikan pada Jumat, 29 Maret 2024 08:24 WIB)
- Laporan



Dina Selasa (26/3) kepungkur Bupati Ipuk Fiestiandani direwangi Plt. Kadisbudpar Taufik, Asisten Pemerintahan Moh.  Bramuda lan Pejabat liyane uga Ketua Dewan Kesenian Blambangan (DKB) Hasan Basri, ngelungaken tali asih kanggo satus seniman, budayawan lan pelaku kepariwisataan Kabupaten Banyuwangi.   
   Acara hang dianakaken ring Pelinggihan Prabu Tawangalun Disbudpar iku kanggo njaga keraketan seduluran antarane Dinas Kebudayaan dan Pariwisata ambi para seniman, budayawan lan para pelaku kepariwisatan Banyuwangi hang selawase iki carem melaku rukun mbangun kepariwisataan ring Banyuwangi.
   "Mula, dikarepaken kelawan anane tali asih iki sing diukur pira gedhene hang diterima. Naming kelendi hubungan apik antarane warga masarakat ambi Disbudpar hususe bisa kejaga,” abane Plt. Kadisbudpar, Taufik.
   Bupati Ipuk Fiestiandani ngengetaken kadhung Banyuwangi nduweni bandha hang gedhi arupa guyub lan gayabe masarakat ulihe milu cawe-cawe mbangun Banyuwangi kelawan keahliane dhewek-dhewek, utamane dulur-dulur seniman kelawan karya-karyane, budayawan kelawan gagasan-gagasane, para pelaku kepariwisataan hang terus ngupayakaken tekane turis ring Banyuwangi kene.
   “Mula, kadhung diukur pira hang diterima ambi uwong-uwong hebat Banyuwangi ngeraina iki, nana paran-parane. Sing sumbut. Kepingine ya bisa nguweni lebih. Taping anggarane pemerintah kudu diedum kanggo keperluan liya-liyane. Isun lan Rika kudu nerima kelawan ati lega,” abane Ipuk. Rabine Menteri PANRB Kang Anas iku uga ngengetaken, Banyuwangi aja sampek ngalami kaya dhaerah liyane. Masiya sing kabeh dhaerah, naming ana hang warga lan pemerintahe nerima investor gedhi. Investor teka luar negeri iku nyulap panggonan ngelencer sampek dadi kaya obyek wisata ring negarane. Kelebu uga masalah pasilitas lan kulinere. Pungkasane, seni, budaya lan kuliner masarakate kecepit sing bisa ubeg lan pungkasane disepelekaken ambi hang duwe dhewek.
   “Banyuwangi aja sampek kaya gedigu iku. Mulane masarakat kudu ajeg nguri-uri seni budaya tradhisi uga masalah kuliner hang has Banyuwangi aja sampek kegeser ambi kuliner impor,” tambahe Ipuk.
   Ring Pelinggihan Prabu Tawangalun iku uga nggawe dhemene seniman lan budayawan, kerana taun 2024 iki Festival Kuwung arep dianakaken maning ring ulan Desember. Apuwa sampek nggawe dhemen atine para seniman lan budayawan? Merga Festival Kuwung iku bisa ngubahaken ekonomi sekabehane unsur. Sanggar-sanggar kesenian tambah kreatip, keneng dienggo panggonan edukasi masarakat kerana tema-tema hang diunggah ngenengi masalah adat, tradhisi, sejarah lan seni asli Banyuwangi.
   “Kadhung kepingin ngeweruhi karya asli tradhisi ya bisa dideleng Festival Kuwung lan Gandrung Sewu. Kadhung kepingin weruh karya modipikasi, akulturasi seni budaya tradhisi lan moderen ya delengen Banyuwangi Ethno Carnival. Kadhung ana kegiyatan-kegiyatan hang gedigu iku, bisa nyangking masalah UMKM kanggo ngelancaraken mutere rodha ekonomi masarakat. Mula pemerintah kudune nganakaken sensus ekonomi dadakan. Umpamane gedigi, sak ulan sedurunge acara gedhi iku digelar, ana pirang uwong hang dodolan ring sak ubenge panggonan acara, perkembangan ekonomine kelendi. Seminggu ngarepaken acara, hang dodolan ana uwong pira lan pira gedhine pemasukan sampek hari H, kelendi sesere rodha ekonomi ulihe munyeng ring sakubenge acara. Iku kudu ana hang nyensus. LSM iku mesthine milu melaku nyensus hang kaya gedigu iku, sakperlu mbantu pemerintah lan masarakat makene saya semangat. Gedigu ya dulur!” abane Ketua Sanggar Sayu Wiwit Aliyan Rogojampi, Jajulaidik, S.Pd.

(Kang Ujik)  

                

                

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor