Teka Pelukis Indonesia Kanggo Palestina
Antariksawan Jusuf (dipublikasikan pada Senin, 25 Maret 2024 08:48 WIB)
- Laporan
Paran hang bisa dilakoni kanggo mbantu wong Palestina hang dipulasara Israel? Pelukis Indonesia nggawe pameran lan lukisane diedol, asile disumbangaken nyang rakyat Palestina.
Pameran hang nduweni aran Kemanusiaan Tanpa Batas digelar ring Aula Buya Hamka, kompleks Masjid Agung Al-Azhar, Jakarta. Dibukak ring Menparekraf Sandiaga Uno dina Kamis Maret Kepungkur sampek tanggal 26 Maret kesuk.
Jare Ketua Panitiane, lare Banyuwangi Taufiq Bachamis, ana 44 lukisan hang dipajang. Ana pisan hang sing milu digantung merga hing lulus kurasi.
Taufiq, hang dikenal ring Banyuwangi kelawan celukan Pak Cik, ngomong gok kerentege para pelukis iki merga ngerasakaken paran hang dirasa rakyat Palestina. "Nyedhekahaken karya iku dadi pilihane," jare Pak Cik.
Para pelukis hang akehe 35 wong teka
Aceh, Lampung, Wajo - Sulsel, Jakarta, Bogor, Tangerang, Bekasi, Boyolali, Cilacap, Surabaya, Jember, Bondowoso, Banyuwangi aju ngejak Laznas Al Irsyad lan LAZ Al Azhar minangka hang diserahi amanah kanggo masarakat Palestina. Laznas Al Irsyad sedurungé wis mbangun tendha-tendha pengungsi Gaza ring Khan Younis, Palestina.
Pelukise kayata Ustadz Derry Sulaiman, Titis Djabaruddin, Hesdi Rabet, Ipriyanto Maryohadi, Esti lan liyane.
"Asile lelang lukisan iki 100 persen disedhekahaken kanggo wong Palestina," jare Pak Cik.
Kecathet hang payu ana wolung lukisan.
Pamerane akeh ditekani wong penting kayata Fuad Bawazier hang dadi ketua yayasan Al Azhar, Prof. Dr. Faishol Nasar bin Madi, MA. Ketua Umum PP Al Irsyad Al Islamiyyah, Prof. Dr. Ing. Ir Misri Gozan M.Tech., Dr.‐Ing. H. Ilham Akbar Habibie, Dipl.Ing., M.B.A., Dr. Ir. Arief Yahya M.Sc, Fadli Zon, Fahri Hamzah, Bunda Neno Warisman, Duta Besar negara sahabat, lan uga keluwarga Gen Halilintar.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
