Tutburi Aljin lan Kelangan Dalan (Bagiyan 1 teka 2)

Antariksawan Jusuf (dipublikasikan pada Rabu, 17 Juli 2024 06:55 WIB)
- Opini

TUTBURI ALJIN LAN KELANGAN DALAN
Ditulis ring Kang Ujik

  Isun dhemen ndeleng tontonan nalikane umur limang taunan. Kala semono Kampung Kerantigan durung dirambati setrum PLN. Sadheng-sadheng kayu ring bucu-bucu pertelonan dalan  mung dipasangi dop 5 watt, dikudhungi tutupe panci alumunium. Isun sing weruh, nawi bain kampung liyane ya padha ambi kampungisun. Kadhung samarwulu teka, hawa sintru milu kerasa. Naming, masiya gedigu, kampungisun dadi rame nalikane ana dulur kang duwe iwuh kemanten surup utawa tepak ana sunatan, nanggap tontonan. Salah sijine tontonan kang cepet diundang yaiku Kesenian Aljin. Sak rombongan dibagi telu. Bagiyan musik ana kang nabuh kendhang, kethuk, keluncing lan gong gedhi. Golongane Aljin ana 3 (telu) kelebu Aljin direwangi Mak Onah lan Kang Sapii.  Golongane Januri uga ana 3 (telu) yaiku Januri direwangi Katirin lan Ahmad Sarbini. Rombongan iku kadhung kundangan dipanggonaken ning jerambah ukuran 4 musuh 8, dhuwure semeter. Ring ndhuwur jerambah iku, golongane tabuhan dipanggonaken ana ring mburine Aljin lan golongane Januri ana ring ngarepane Aljin. Tontonan kang diangkati jam woluan iku dikawiti kelawan maca lontar disambung paculan kang isine wangsalan/basanan, gendhing lan tabuhan. Adate kang mangkat sulung golongane Aljin. Gadug tengah wengi kira-kira jam rolasan diganti golongane Januri. Taun 70-an iku ning endi ana kesenian Pacul Gowang isun sak kancaan mesthi ndeleng: Ayo ndeleng Aljin yuk! Kadhung wis ana kang ajak-ajak gedigu iku, sing kathikan semaur maning, aju nyoplok sarung lan beruwat bareng-bareng. Ngarepaken subuh mulih melebu langgar. Mari subuhan aju ngorok anter-anteran ring langgar.
   Kesenian Aljin wangune rada suda main ring panggung-panggung nalika Ria Record mangkat ngerekam kesenian-kesenian Banyuwangen kayadene: Damarulan (Wargo Budoyo-Pengantigan Banyuwangi), gendhing-gendhing Gandrung, angklung, kendhang kempul lan kelebu uga kesenian Macaan  Pacul Gowang Aljin. Kerana masarakat kang ngundang wis suda, Pemerintah mikiraken kelendi carane kesenian Macaan Pacul Gowang iku sing gancang kimples. Kawitan, Radio Khusus Pemerintah Daerah (RKPD) genten-gentun muteri kaset pita kesenian Banyuwangen kelebu Macaan Pacul Gowang saben malem minggu. Dadi anane perkembangan teknologi, kesenian-kesenian akeh kang sing diundang masarakat. Kerana masarakat kadhung kangen kesenian Aljin, cukup nyetel nganggo tape recorder. Paran maning kadhung nyetel sampek ana kang  ngunggahaken suwarane ring corong/alo-alo.  Kaping pindho, kesenian Aljin diundang Pemerintah kanggo pentas hiburan ring Gesora (saiki Gesibu) Blambangan. Tau uga dipromosikaken ring Taman Ismail Marzuki Jakarta sekira taun 1974. Kala semono, tokoh teater Nano Riantiarno tau ngomong kadhung kesenian Aljin iku conto teater modern. “Mulane, lare  nom-nom aja pati ngajok-ngajokaken kesenian teka bangsa liya. Merga kesenian ring pelosok-pelosok negeri lebih hebat lan lebih maju,” abane Nano nalikane nguweni pelajaran ning peserta Diklat Teater sak Jawa Timur ring hotel Rembang-Jember taun 2000 kepungkur.
   Nalika HUT kaping 50 Proklamasi Kemerdekaan RI (1995), Pemerintah Kabupaten Banyuwangi bareng ambi Dinas Pendidikan Propinsi Jawa Timur nganakaken lokakarya 10 dina ring Hotel Pinangsari. Pesertane yaiku Abdullah Fauzi, Subari Sofyan, Sahuni, Sumitro Hadi, Sutedjo Hanafi, H. Andang CY,   BS. Noerdian, Hasnan Singodimayan, Hasan Ali, Soemartini Moenaris, Dariharto lan peserta dhayoh yaiku ahli musik tradhisional internasional, Kang Ando. Rencanane ring acara 10 dina iku, sabendina bisa ngasilaken buku kesenian kang dibahas. Dina kawitan ngundang grup Hadrah Kuntul Lanang. Grup iku dikongkon tampil sak jam. Mari tampil sak jam iku saben-saben peserta dipaserahi tugas dhewek-dhewek secara kelompok. Abdullah Fauzi kumpul ambi H. Andang CY, BS.Noerdian uga Hasan Ali nakon-nakoni masalah syiir-syiir salawatan kang dilantunaken. Uga syair-syair lagu Nasional kayadene Garuda Pancasila, Maju Tak Gentar lan liya-liyane. Sutejo Hanafi lan Sahuni takon-takon masalah tabuhane, Subari Sofyan, Sumitro Hadi lan Bu Soemartini Moenaris ngurusi masalah obah lagake jugedan, dandanan lan pepaesane. Kala semono njumbul uga Niluh kang magih dadi Mahasiswi Sekolah Kesenian Denpasar dadi salah-sijine peraga ubah-ubede jugedan Bali lan Janger Banyuwangi.  Nah…. ngenengi masalah kesenian Hadrah Caruk, kayane ana gandheng renteng ambi njumbule kesenian Aljin. Kesenian Hadrah Caruk iku dudu Kuntulan Caruk. Tapi wujud grup kesenian kang tabuhane arupa gong, kendhang lan marawis (terbang cilik utawa keplak). Tampilane dikawiti macaan lontar aju disambung banyolan kelawan wangsalan.

(Ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.