Wektune Nggathil Kanggo Milu Nulis Puisi/Gurit Harjaba
Antariksawan Jusuf (dipublikasikan pada Jumat, 29 November 2024 09:24 WIB)
- Dari Redaksi
Dina hang dianteni wis kari itungan jam. Sithik maning wektu kanggo ngirimaken puisi/gurit kang dielungaken kanggo mengeti dina laire Banyuwangi wis nggathil.
Seperene para sastrawan Using kayata Kang Ujik, Kang Budiosing, Kang Moh. Syaiful, Begawan Tjiptoroso, Kang Prastono wis ngirim gurite.
Ana lare sekolah SMK, lan uga sastrawan teka dhaerah liya hang sore milu Jambore sastra nang Banyuwangi.
Buku hang isine gurit (basa Using) utawa puisi (basa Indonesia), dikarepaken bisa dadi hadhiyah kanggo Hari Jadi Banyuwangi kaping 253.
Tanggal 18 Desember, diitung sakat 1771 tepak pasukan Belambangan hang dipimpin Rempeg Jagapati bisa ngalahaken pasukan penjajah Landa, didadekaken pengenget gok embah buyut bengen berjuwang toh pati kanggo ngerebut lemahe hang dikangkangi wong liya.
Sengker Kuwung Belambangan (SKB) disokong ambi Pak Sutarjianto, arep ngelumpukaken gurit lan puisi dadi buku kanggo perayaan iku.
Banyuwangi lan Belambangan kaya dene wolak-walike picis kenthing hang mohal dipisah. Masiya asal-usule mangkat teka kerenteg hang beda.
Tema hang dijuwut kanggo gurit/puisi iki pokoke hang nduduhaken rasa welas nang Banyuwangi/Belambangan. Ibarate hang ditulis iku bisa paran bain teka endahe lan sugihe alame teka gunung sampek segara rupek Selat Bali lan kedadeyan ring wong-wonge hang ngisi ring antara gunung lan segara iku mau.
Sarate puisine iki:
1. Gurite/puisine nduweni tema Banyuwangi/Belambangan
2. Saben wong hang milu ulih ngirim paling akeh rong judhul.
3. Gurit/Puisi bisa nganggo basa Using utawa basa Indonesia
4. Hang puisi/gurite milu diuwot ring buku iku ulih sak buku geratis. Naming kadhung ana ongkos pengiriman kudu nanggung ongkos kirime.
5. Hang kudu dikirim nang email: basausing@gmail.com hing mung puisi taping uga poto lan biodata cendhek.
Kabeh iku setemene sakderma kanggo Banyuwangi/Belambangan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
