Wildan Suyuthi, Pendekar Hukum lan Buku teka Genteng

Antariksawan Jusuf (dipublikasikan pada Jumat, 27 November 2020 07:31 WIB)
- Tokoh

"Merga Buku Isun Ana" gedigu salah siji unen-unen hang tau ditulis ahli hukum teka Genteng, Dr. Drs. H. Wildan Suyuthi Mustofa, SH, MH gedigu aran jangkepe wong kelairan Genteng taun 1947. Hing maido merga iyane wis nulis 12 buku penting masalah hukum lan puluhan artikel ilmiyah liyane.
   Kadhung rika mbukak pasar online, mesthi ana bukune hang ditawakaken. Salah siji bukune Kode Etik Hakim hang dadi andhelan merga akeh dienggo rujukan S2 lan S3 wong hang mbahas Etika Profesi Hukum.
   Ana maning Sita dan Eksekusi hang diterbitaken kawitan taun 2004 hang wis diambal cetake kaping sepuluh.
   Buku-buku liyane umpamane: Panitera Pengadilan, Tugas, Fungsi dan Tanggungjawab, Etika Profesi dan Kode Etik Hakim, lan Kapita Selekta Perbankan Syariah. Disertasine: Reformasi Hukum Bidang Kekuasaan Kehakiman dan Implikasinya Terhadap Independensi Pelaksanaan Tugas Hakim Pengadilan Agama uga arepe didadekaken buku.
   Pelatihan lan seminar masalah hukum hang dipiloni hing mung sewates ring Indonesia, taping sampek ngambah negara manca kayata Australia, Jepang, Kanada, Philipina, Singapura, Sudan Afrika, lan Thailand.
   Tepak magih cilik iyane melebu sekolah ring Sekolah Rakyat (SD jaman bengen) Muhammadiyah Genteng lan lulus taun 1960. Manggone ana ring kidule Pasar Genteng. Kadhung tepak usum layangan, milu memengan layangan nong kuburan ngarepe tanah kebon kelapa ane bapake, Pak Zainal Musthofa, hang dadi guru lan motivator. Merga bapake iki bengen melibeng pirangane pondhok kayata Lasem Rembang, Termas Arjosari Pacitan bareng ambi mantan menteri agama Prof. DR. Mukti Ali, aju tepak kang Wildan kuliyah ring IAIN, bapake ngongkon iyane melibeng nyambangi pondhok-pondhok pisan kelebu Pondhok Bendo Pare, Tebuireng, Termas, Gontor lan Ciampea Bogor.
   Karir pegaweyane dikawiti dadi hakim ring Pengadilan Agama Wonogiri taun 1976, aju pindhah ring pirangane kutha liya Surakarta lan Jakarta Barat, lan tau pisan dadi Hakim Tinggi Pengadilan Tinggi Agama lan jabatan pungkasan dadi Ketua Pengadilan Tinggi Agama Semarang taun 2012 sampek pangsiun taun 2014 lan manggon ring Solo ambi rabine Dra. Hj. Sriyati Zakiah, Apt.
   Sak liyane akeh nulis buku, iyane ya wis tuwuk sekolah. Sak mareke lulus sarjana IAIN Sunan Kalijaga taun 1974, iyane kuliah S1 maning ring fakultas Hukum Universitas Muhammadiyah Yogyakarta lulus taun 1991. Aju nerusaken S2 ring Sekolah Tinggi Ilmu Hukum Islam Jakarta taun 2002 lan ulih gelar doktor marek kuliah S3 ring Universitas Islam Bandung taun 2013, setaun sedurunge pangsiun. Propesi hakim lan kuwate sekolah nurun ring anak kemunjilane hang saiki dadi hakim ring Pengadilan Negeri Solo lan nganteni dadi doktor ring Universitas Negeri Solo.
   Hang sing bisa dilalekaken tepak magih cilik ring Banyuwangi, saben subuh diejak bapake sholat ring masjid Jamik Genteng. Uga "adus-adusan ring banyu Pecari," jare kang Wildan, hang duwe anak telu lan enem putu iki.
Sak mareke pangsiun Ketua Alumni Fakultas Syariah UIN Sunan Kalijaga sak Indonesia iki magih aktip ring kegiyatan sosial. Umpamane Komunitas Doktor/Profesor ADHI, Ketua Silaturahmi Purnabakti Pengadilan Agama lan liya-liyane.
   Kadhang iyane katon ngewani semangat nang wong-wong hang dipinggiraken ring kehidupan sosial kayata pemulung, wong bambung, wong melarat hang akeh ditampung ring Dinas Sosial lan PMI Solo.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.