Wisata Alam Banyuanyar, Kopine Kelas Dunia

Antariksawan Jusuf (dipublikasikan pada Minggu, 27 Maret 2022 09:36 WIB)
- Wisata



Ana siji maning panggonan kelenceran duwene wong lokal hang kudu diparani ring Banyuwangi: Wisata Alam Banyuanyar (WAB) ring kawasan Kalibaru.
   Kadhung wong teka arah Banyuwangi bisa nunggang sepur mudhun Kalibaru, utawa kendharaan dhewek sak mareke pasar Kalibaru ana dalan meliguk ngulon, nyabrang ril sepur, kira-kira adohe mung rong kilo, ring dusun Curah Leduk desa Banyuanyar,  kecamatan Kalibaru. (Banyuanyar ambi Kalibaru iki setemene paran bedane ya? Malah kadhung nganggo aplikasi waze ana metu Kalianyar).
   Panggonane sebelah tengen dalan, ring kono wis ana gapurane kelawan tulisan: Wisata Alam Banyuanyar.
   Jare hang duwe, Kang Rahman ([email protected]) hang uga pengurus ring Ikaje (Ikawangi Jember), setemene jujugan kelenceran iki wis dibukak sakat 1 Jan 2019, naming merga ana pageblug akeh wong hang wurung kelenceran.
   Marek bayar karcis (limang ewu, parkir sepidhah montor rong ewu lan parkir montor limang ewu), kene melaku mudhun hing kariya adoh kira-kira 50 meter ngeliwati kebonan wit kopi aju mata langsung bisa ndeleng wit-wit dhuwur lan kuping rungu suwarane banyu gemerujug. Merga nong ngingsor ana gerujugan wera teka banyu kali. Hawane dherem merga ring ngingsor wit-witan gedhi lan ana banyu ring ngingsore.
   Kadhung merono enake telpon sulung nong pengelolane (08124965575) bisa pesen paket wisata kuliner, mbayar 37 ewu sak uwong, aju disedhiyani pisan pecel ithuk, jangan pakis (pakis Kalibaru mula wis kawentar enak, enom-enom lan seger), gimbal jagung, tahuk tempe goreng lan jajanan tradhisional kayata cenil, kelepon, lupis lan kucur.  Kadhung pesen wisata budaya bisa pisan disiyapaken tontonan pencak silat, tari macan-macanan, sapi-sapian, hadrah lan uga gandrung.
   Merga ana kali lan gerojogan, ana panggonan dienggo adus-adusan, ana kolam dienggo lare cilik lan uga dienggo wong gedhi. Sakliyane iku ya ana flying fox, skybike, nyon-nyonan raksasa, panggonan selfie, panggonan kemah, lan rumah pohon.
   Panggonan mangane disedhiyani meja kursi ring ndhuwur genjot jajang, wong hang mangan ring kono bisa ambi ndeleng banyu gemerujug ring ngingsor.
   Panggonan kelenceran ane masarakat iki werane rong hektar taping hang dimanpaataken buru 40 persene. Liyane magih digeningaken asri alami.
  Ring kono ya disedhiyani asil kopi rakyat hang bisa diiling kopine ambi barista lokal. Ana king of robusta, pea berry, robusta milky, kopi luwak lan wine kopi hang disuguhaken adhem diandohi es lan disuguhaken ring gelas anggur. Rasane enak kaya emeh ana ombenan anggur-anggure sithik.
   Kopi produksi Kalibaru iki wis diekspor nyang Jerman, Uni Emirat Arab, Landa lan Brazil. "Kopi Kalibaru iki kopi dunia," jare kang Rahman.
   Rasane sedina ring kono kaya hing cukup wektune, magih kepingin merana maning.
   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf